कहिलेसम्म कोभिड संक्रमितप्रति विभेद राख्छौ ?

झण्डै नेपाल कोरोना भाइरसले आक्रान्त पारेको पनि सात महिना पार गर्दैछ । यति लामो समयसम्म संक्रमित हुनेहरुको सूची पनि लामै छ । त्यो सँगसँगै संक्रमित भएबापत समाजको तिरस्कारको सिकार हुनेहरुको सूची पनि लामै छ । जति पनि तिरस्कृत भएका छन्, ति सबैप्रति आफूलाई सभ्य समाजको अग्रदस्ताको मोह सम्झनेहरुबाटै भएको छ । जहाँसम्म यसरी विभेदको सिकार हुनेहरुमा सर्वसाधारणदेखि कोरोना भाइरसका विरुद्ध ढाल बनेर अग्रदस्तामा सरिक रहने डाक्टरहरुका विरुद्ध समेत त्यो तप्का खनिएको हाम्रा सामु प्रष्ट छ ।
यस किसिमका गतिविधिमा सरिक हुनेहरुलाई सुरुका दिनमा चेतनाको अभावले यस्ता घटनाक्रम निम्तिन गएको भन्दै थुम्थुम्याउने काम भयो । त्यसैले आज पनि ति घृणित घटनाहरु रोकिएनन् । यदि तत्कालै सरकार वा सरोकारवाला निकायले कडा कदम चालेको भए आज यो भयावह अवस्था आइपुग्ने थिएन । जसको कारण कोरोनाको नाउँमा सातौं महिना चलिरहँदा पनि विभेद ज्यूँकात्युँ भएर बसेको छ । होला, गुणात्मक वा संख्यात्मक तलमाथि तर पछिल्लो समय काठमाडौंका फुटपाटहरुमा खुल्ला आकाशलाई आश्रय स्थल बनाएर रात बिताउनेहरुको संख्या हेर्दा यो घटनाक्रम कतातिर गइरहेको छ भन्ने तर्फ सजिलै आँकलन गर्न सकिन्छ ।
तसर्थ यस किसिमका विभेदकारी व्यवहार गर्नेहरुका विरुद्ध मानवीय रुपमा नभई कानूनी रुपमै कदम चाल्नुको विकल्प छैन । आज जुन किसिमको मानवीय संवेदनशीलतामाथि प्रहार भएको छ, त्यसतर्फ गम्भीर रुपमा अनुसन्धान गर्नुपर्ने आजको तड्कारो चुनौती देखिएको छ । यसमा सम्बन्धित पक्षले गम्भीर चासो राख्दै विभेदपूर्ण क्रियाकलापलाई निरुत्साहित पार्न तत्काल सक्रियता देखाउन आवश्यक छ । यसका लागि सम्बन्धित स्थानीय निकायहरुलाई परिचालित गरेर यस किसिमका घटनामा संलग्न आततायीहरुलाई कडाभन्दा कडा कारवाही गरी कानूनी दायरामा ल्याएर समाजमा बिग्रिँदै गएको शान्ति, सुरक्षा र अमन, चयनलाई व्यवस्थित रुपमा फेरि अगाडि बढाउन आवश्यक देखिन्छ । त्यसका लागि सम्बन्धित सबै पक्षको उतिकै दायित्व, जिम्मेवारी र कर्तव्य हुनेछ भन्ने ठहर हामीले गरेका छौं । अन्यथा, सम्बन्धित पक्षले यस्ता घटनाक्रमलाई सामान्य ढंगबाट लिने र विभेदकारी क्रियाकलापमा सरिक हुनेहरुका लागि कडा रुपमा प्रस्तुत नहुने हो भने त्यसबाट निस्कने कुनै पनि अप्रिय घटनाहरुको सामना गर्न तयार हुनुपर्ने छ । जसको विकल्प तत्काल निकाल्न नसके नेपाली आकाशमा फेरि पनि कोरोनापछिको डरलाग्दो कालो बादल नमडारिएला भन्न सकिने अवस्था नभएको निचोडमा हामी पुगेका छौं ।