नेकपा कुनै पनि हालतमा फुट्दैन- इन्चार्ज शाक्य, सन्दर्भ – उज्ज्वल लामाको श्रद्धाञ्जली सभा

रोशी/नेपाल कम्युनिष्ट पार्टी (नेकपा) काभ्रे जिल्ला सदस्य उज्ज्ल लामाको निधन भएको १३ औं दिनको श्रद्धाञ्जली सभालाई सम्बोधन गर्ने क्रममा नेकपाका स्थायी कमिटी सदस्य तथा वागमती प्रदेश इन्चार्ज अष्टलक्ष्मी शाक्यले नेकपा कुनै पनि हालतमा फुट्दैन, निकै कठिनहरु झेलेर बनेको पार्टी हो भन्नुहुँदै कम्युनिष्ट आन्दोलनमा लामाको निधनले पार्टीले ठूलो क्षति पु¥याएको बताउनुभएको छ । दिवंगत लामाको जन्मथलोमै आयोजित श्रद्धाञ्जली सभालाई सम्बोधन गर्ने क्रममा इन्चार्ज शाक्यले उक्त भनाइ राख्नुभएको हो ।

सोमबार आयोजित श्रद्धाञ्जली सभामा इन्चार्ज शाक्यले हाम्रो पार्टीलाई क. उज्वलको निधनले निकै ठूलो क्षति भएको छ । शाक्यले भन्नुहुँदै उहाँको मृत्यु भएपनि स्व. लामाले गर्नुभएको असल कामहरु हाम्रा मनभित्र रहनुपर्छ । त्यो नै सिंगो पार्टीको ढुकढुकी भएर बाँचिरहनेछ ।

सम्बोधनकै क्रममा अहिले पार्टी अप्ठ्यारोमा परेको बताउँदै पार्टीलाई बलियो बनाउन पार्टीभित्र बहस आवश्यक भएको बताउनुभएको थियो । यतिखेर पार्टी अप्ठ्यारोमा छ । पार्टीलाई बलियो बनाउन बहस चलिरहेको छ । पार्टी इन्चार्ज शाक्यले थप्नुभयो– नेकपा कुनै पनि हालतमा फुट्दैन, निकै कठिनहरु झेलेर बनेको पार्टी हो । बलिदान, जेलनेल खाएर निर्माण भएको पार्टी हो ।

कार्यक्रममा नेकपा वागमती प्रदेशका सचिवालय सदस्य एवं पूर्व उर्जा राज्यमन्त्री सूर्यमान दोङ (लालध्वज) ले पार्टीको मूल मर्ममा उज्ज्वल कमरेडको निधनले ठूलो धक्का पुगेको बताउनुभएको छ । जिवित हुनेहरुले असल अर्थमा श्रद्धाञ्जली अर्पण गर्ने हो भने दिवंगत उज्ज्वलले छोडेर गएको बाँकी काम पूरा गर्नुपर्नेमा जोड दिएका थिए ।

त्यसैगरि कार्यक्रममा नेकपा बागमती प्रदेश कमिटी सचिवालय सदस्य तथा संघीय सांसद गंगाबहादुर दोङ्ग, (बमध्वज), नेकपा वागमती कमिटी सचिवालय सदस्य तथा चौंरीदेउराली गाउँपालिकाका अध्यक्ष दिननाथा गौतम (प्रयास), पार्टी जिल्ला अध्यक्ष रुकु चौंलागाईं, सचिव टोकबादुर वाईबा, संविधान सभा सदस्य तथा वागमती प्रदेश कमिटि सदस्य रामहरि सुवेदी, वागमती प्रदेश कमिटि सदस्यहरु तेजबहादुर मिजार, इन्द्रबहादुर थिङ, मिमबहादुर तामाङ, प्रदेश कमिटि सदस्य तथा प्रदेश सांसद लक्ष्मण लम्साल, प्रदेश सांसदद्वय रत्न ढकाल, चन्द्र लामा लगायतले दिवंगत लामाप्रति श्रद्धाञ्जली अर्पण गर्नुभएको थियो ।

काभ्रेली कम्युनिष्ट आन्दोलनमा निक्कै ठूलो योगदान रहेको युवा नेता उज्ज्वल लामा काभ्रे जिल्ला रोशी गाउँपालिका वडा नं. ६, साविक सिपाली चिलाउने गाविस वडा नंं २ मा बुबा गुञ्जमान लामा र आमा म्हेन्दोमाया लामाको कोखबाट २०३४ साल कार्तिक १५ गते जन्मिएका थिए । लामा २०४७ सालमा तत्कालीन अ.ने.रा.स्व.वि.यू. (छैठौं) मा आबद्ध भई तत्कालीन नेकपा (चौ.मा) बाट राजनीतिक जीवन शुरु गरेका थिए । २०५४ सालमा नेकपा (एकता–केन्द्र–मशाल) को सदस्यता प्राप्त गरी २०६५ सालमा एकीकृत नेकपा (माओवादी) को जिल्ला सदस्य हुँदै नेकपा माओवादी केन्द्रको केन्द्रिय महाधिवेशन आयोजक कमिटिको सदस्य समेत भएका थिए । हाल उनी नेपाल कम्युनिष्ट पार्टी (नेकपा) का जिल्ला सदस्य समेत रहेको कार्यक्रममा जानकारी गराइएको थियो । उनको परिवारमा श्रीमती शान्ति लामा, २ छोरा उशान र प्रशान, आमा र बुबा रहेका छन् ।