सत्ता मोहले अस्थिरता ननिम्त्याओस्

पछिल्लो समय कार्यकारी प्रमुखबाट सार्वजनिक भएका अभिव्यक्तिले मुलुकमा अस्थिरता आउने संकेत गरेको छ । जसको पछिल्लो झट्का काभ्रेले दिएको छ ।
यसले ठूलो बलिदान पश्चात् निर्माण भएको संविधानको मान, मर्दन हुने हो कि भन्ने संकेत मिलेको छ । संसद विघटनका विरुद्ध उठेका आवाजहरुलाई कुण्ठित गर्ने जुन किसिमको कु–चेष्टा सत्ताले गरेको छ, त्यसलाई सिंगो र बौद्धिक दिर्गामा राम्रो सन्देश गएको छैन । सर्वाेच्च अदालतमा परेका रिटहरुको किनारा हुनै लाग्दा कार्यकारी प्रमुखका अभिव्यक्तिले तमाम नेपालीलाई २०५७÷०५८ तिरको द्वन्द्वको झल्को दिलाएको छ ।
प्रधानमन्त्रीका स्वच्छाकारी कदमले मुलुकलाई यथार्थमै प्रतिगमनतर्फ धकेल्ने आभाष बौद्धिक दिर्गामा चर्चाको विषय बनेको छ तर कार्यकारी प्रमुख त्यो सत्य स्वीकार्न सक्दैनन् । यो जटिल परिस्थितिमा नेपाल कम्युनिष्ट पार्टीबीचको द्वन्द्वले सिंगो मुलुक आक्रान्त मात्र बनेको मात्र छैन, अस्थिरताको चंगुलमा फस्ने देखिएको छ ।
दैनिक हुने प्रदर्शनले त्यो झझल्को दिएको छ । जसका कारण सुरक्षा निकायमा क्रियाशील सुरक्षाकर्मी बिचमै अस्थिरता मात्र छाएको छैन, व्यवस्थाप्रति नै वितृष्णा जाग्न पुगेको छ । यो गम्भीर विषयका रुपमा हाम्रा अगाडि आएको छ । समर्थन र प्रतिकारका घटनाले मुलुक द्वन्द्वमा रंगिएको छ । यि दुई धारमा देखिएका कम्युनिष्टहरुबाट साम्राज्यवादका नाइकेहरुले फाइदा त लिने नै छन् । त्यसैको पर्खाईमा लामो षड्यन्त्र, जालझेलपछि उनीहरुको योजना सफल भएको मान्नुको विकल्प छैन । त्यसैले नेपाली जनताको लामो त्याग, तपस्या र बलिदानबाट प्राप्त सीमित अधिकार अन्ततः कुण्ठित नहोला भन्न सकिन्न ।
यो जटिल अवस्थामा व्यक्तिगत स्वार्थ त्यागेर शक्ति संघर्षलाई व्यवस्थित गरी गति दिनुपर्ने अवस्था आएको छ । अन्यथा कार्यकारी प्रमुखबाट प्राप्त उपलब्धीहरुलाई कुल्चने काम भएको छ । यो हाम्रो मुलुकको लागि दुर्भाग्य मान्नुपर्दछ । ७० वर्षदेखिको नेपाली जनताको आशा, भरोसा र त्याग फेरि ५०औं वर्षसम्म मृत रहने विश्लेषकहरुको दाबी छ । यो अवस्थामा हुनुमा नेतृत्वबीचको छिनाझम्टी मात्र हो भन्दा फरक पर्दैन । मुलुकमा आजको अवस्था सिर्जना हुनुमा सत्ता मोह नै प्रमुख कारक हो भन्ने निचोड हाम्रो छ । कानूनी शासनलाई लत्याउँदै हुकुमी शासनको झल्को कार्यकारीबाट दिलाएको महसुस हुन्छ । यो लोकतन्त्रका लागि कदापी सुयोग्य हुन सक्दैन भन्ने ठहर हामीले गरेका छौं । कतै सत्ता मोहकै कारण मुलुक अस्थिरताको सिकार नबनोस् भन्ने नै हाम्रो चाहना हो । तसर्थ, सत्ता मोहले अस्थिरता ननिम्त्याओस् भन्ने नै हो ।