सम्बन्ध

सजना गोले, काभ्रेपलाञ्चोक

मैले आकाशलाई हेरिरहेँ
सोचे यति फराकिलो चिज अरु के होला !!
फेरि एक पट्क आफू माथिको पहाडलाई हेरेँ
कसरी निर्धक्क उभिएर बस्न सकेको होला
त्यो पहाड !!!

र आफू बाँचेको भूगोल हेरेँ
ओहो !! यहाँ कसरी बाँधेको होला
सम्बन्धको घेरो
कस्तो होला सम्बन्ध बाँधिने विश्वासको धागो
कस्तो होला सम्बन्ध सिउनी त्यो सियो
बनाएकै छैन सायद आज सम्म दुनियाँले

यहाँ त सबन्ध जोड्ने तोड्ने
अझ भनौ
सम्बन्धकै बेचबिखन हुने यो शहरमा
मैले सम्बन्धको परिभाषा खोज्नु भनेको
गुलेलीले आकाशको तारालाई ताक्नु जस्तै हो

जब ठोकिन्छ कसैको आवाज हृदयमा
मुटुमा पसारिन्छ शब्दहरू
अनि सम्झिँदो रहेछ सम्बन्ध
तोकिदिदो रहेछ यहाँनेर सम्बन्धको सिमा
न त भत्काउन मिल्ने
त चिन्नै मिल्ने

सम्बन्ध सिलाई रहनु त्यति सजिलो कहाँ छ र
विवेकले सियौ भने
मैले बुझेको आकाश भन्दा फराकिलो त्यही हुनेछ
त्यसै उभिएको होइन त्यो पहाड
उ भित्र सम्बन्धको गाढा रंग पोतिएको छ
अझ भनौ सम्बन्धमा प्रेम होइन विश्वास हुनुपर्छ

अब यति हेक्का राख्नु प्रिय !!
प्रेम र सम्बन्धको तादात्मयता मिलाउन सक्यौ भने
विश्वासको धागो कहिले पुरानो हुँदैन
कुनै रङ मिसिएको हुँदैन
न म्याद नै सकिन्छ
न त मक्किएर जाने डर

जसरी बालियो हुन्छ
हृदयका धागोहरू
उसरी नै टिकिरहन्छ
जीवनको एक फेहरिस्त
एउटा जीवन्त सम्बन्धहरू ।।