गोठका लैना भैसी सम्झेर नगरवासीले यथोचित निर्णय गर्नेछन्ः प्रमुख न्यौपाने

काभ्रे । दुई बर्ष अगाडी पनौती नगरलाई पशु पालन तथा कृषिको क्षेत्रमा आत्मनिर्भर बनाउने लक्ष्य सहित सुरु गरिएको विपन्न किसानका लागी पाडी वितरण र सुत्केरी भैसी भत्ता कार्यक्रमका बारेमा चौतर्फी आलोचना र समर्थन नभएका होइनन् ⁄ दुरगामी सोचले दुरगामी परिणाम ल्याउँछ भन्ने अभिप्रायःका साथ अगाडी सारिएको अभियानले नगरवासीको जिवनस्तर उठाउन महत्वपूर्ण भूमिका रहन्छ भन्ने तथ्य अहिले आएर पुष्टि भएको छ । जुन अठोट सहित सुरु गरिएको अभियानले आज प्रत्येक किसानको अनुहारमा खुसीको बहार ल्याएको छ भन्नुहुन्छ नगर प्रमुख भिम न्यौपाने ।
संवादकै क्रममा जिज्ञासा मेटाउदै गोठका लैना भैसी सम्झेर किसानले कामको मुल्याङकन गर्ने बताउनु हुदैँ विकास निर्माण, बाटोघाटो, पुलपुलेसा मात्र विकास हैनन् है ! नगरवासीको जिवनस्तर माथि उठाउने कार्यक्रम पनि विकास हो भन्ने हेक्का हुनुपर्छ । त्यही मर्मलाई आत्मसाथ गरेर चालिएको कदम नै आज नगरमा कोसेढुंगा सावित भएको छ । हिजो जस्तो लाग्छ पाडी वितरण गरेको तर आज हजारौं किसानको गोठ लैना भैसीले भरिएको सुन्न पाउँदा अत्यन्तै आत्मसन्तुष्टी मिलेको छ । यसले निम्न बर्गीय किसानमा सम्वृद्धिको लहर ल्याउने छ । जसबाट किसानहरुको आत्मसन्तुष्टी सँगै जिवनस्तरमा आमुल परिवर्तन गराउने विश्वास नगरले लिएको नगर प्रमुख न्यौपानेले खुलासा गर्नुभएको छ ।
सोही सम्बन्धमा कृषि शाखा प्रमुख पशु विज्ञ मणिप्रसाद सापकोटाको कथन छ– पनौती नगर दुध मात्र होइन, मासु र कृषिजन्य उत्पादनमा आत्मनिर्भर भएको संकेत यसले दिएको छ । पशु कार्यालयको अनुमानलाई समेत एक फड्को पछि पार्दै पाडीहरु लैना भैंसीमा परिणत भएका छन् । जसको कारण पनौती पशुपालनका लागि उपयुक्त वातावरण सहितको गन्तव्य पुष्टि गरेको छ । यसले मुलुकका अन्य क्षेत्रका किसानका लागि प्रेरणा मिल्नेछ भन्ने विश्वास हामीले लिएका छौं । सुरुका दिनमा जुन अभियान उठाउने जमर्काे गरिरहँदा मनमा अनगिन्ती शंका, उपशंकाहरु नजन्मिएका हैनन् तर ति सबै शंका, उपशंकाहरु व्यर्थ भएका छन् । जसले कृषि तथा पशु शाखाले नगरमा गरेका कामहरुको मूल्यांकन अब विज्ञले होइन, किसानले गर्नेछन् भन्ने अपेक्षा हामीले लिएका छौं भन्नुहुन्छ पशु विज्ञ सापकोटा ।
उहाँको थप कथन छ– पनौती नगरलाई कुखुराको अण्डाको साथै कुखुराको मासुमा समेत आत्मनिर्भर बनाउँदै मुलुकका अन्य भूभागमा समेत आपूर्ति गर्न सक्ने बनाउने लक्ष्य सहित कृषि शाखा अघि बढेको छ । सो कार्यका लागि प्रदेश सरकारसँग आवश्यक परामर्श र योजना समेत पेश भइसकेको छ । आशा छ, प्रदेश सरकारबाट पनौती नगरको माग सम्बोधन हुनेछ, जसले यस नगरका किसानहरुको आत्मसन्तुष्टि मिल्नेछ । जसबाट पनौती नगर सम्वृद्ध नगरको रुपमा मुलुकमा स्थापित हुनेछ ।