वाङको आगमनलाई सकारात्मक रुपमा लिनुपर्छ

एमसीसीले आक्रान्त बनेको नेपाली राजनीतिले फड्को पार गर्ने संकेत मिलेको छ । चीनको स्टेट काउन्सिलर तथा परराष्ट्रमन्त्री वाङ यीको ३ दिने नेपाल भ्रमणले नेपालीहरुबीच अब चीनसँगको सम्बन्ध बिग्रियो भन्ने आशंका निवारण हुने आशा पलाएको हो ।
जुन अवस्थामा एमसीसी नेपाल प्रवेश ग¥यो, त्यसपछिका दिनहरु नेपालीहरुका लागि सहज भएनन् । त्यसको पछाडि छिमेकी राष्ट्रहरुसँगको सम्बन्धमा केही आँच आएको आशंका नेपाली जनहरुले गरिरहँदा वाङको आगमनले उत्तरतिरको चिसिएको सम्बन्धमा सुधार हुने अपेक्षा राखेका छन् । अघोषित रुपमा नाकाबन्दी भन्दा पनि फरक नपर्ने किसिमबाट नाकाहरुमा कारोबार भइरहेको अवस्थामा वाङको आगमनलाई महत्वका साथ हेरिएको छ ।
यो आगमनलाई आगमनमै सीमित नराखी यसलाई नगदको रुपमा सल्टाउन सक्नु नेपाली राजनीतिभित्रको बुद्धिमत्तापूर्ण प्रयोगका रुपमा लिन सकिन्छ । तसर्थ, राष्ट्रिय राजनीतिले एकपटक फेरि कोल्टो फेर्ने अपेक्षा नेपाली जनहरुले राखेका छन् । यो अवस्थामा वाङको सद्भावपूर्ण भ्रमण फलदायी बनाउनुको साथै चीन र नेपालीबीचको सुमधुर सम्बन्ध प्रगाढ हुने अपेक्षा राखिएको छ । वाङको नेपाल भ्रमणको सम्बन्धमा सार्वजनिक भएको विज्ञप्ति अनुसार राष्ट्रपति देखि विपक्षी दलका नेतासम्म भेटघाट रहने कार्यक्रम देखिरहँदा यसबीचमा नेपाल र चीनसँगका व्यवसायिक नाकाहरुबाट भित्रिनुपर्ने सामानहरु सोचे जसरी नआएकोमा व्यवसायीहरु चिन्तित छन् अहिले ।
त्यसैले पनि यो भ्रमणले महत्व राख्छ भन्ने अपेक्षा विशेषतः व्यवसायीहरुले राखेका छन् । अमेरिकी सहयोग परियोजना मिलिनियम च्यालेन्ज कर्पाेरेशनसँगको सम्झौताले नेपाल र चीनबीचको सम्बन्धमा आउनसक्ने दरारका बारेमा जति चर्चा भइरहेको छ, त्यसका बारेमा अब एउटा स्पष्ट अवधारणा सार्वजनिक हुनेछ र चीन र नेपालबीचको सम्बन्ध पूर्ववतः अवस्थामा कायम हुनेछ भन्ने अपेक्षा राखिएको छ । यो संक्रमणकालिन अवस्थालाई गम्भीर रुपमा लिँदै नेपालको यो भ्रमणमा चीनले खुलेर आफ्ना कुराहरुलाई राख्ने र नेपालले पनि व्यवसायिक कुराहरुलाई सहज रुपमा प्रस्तुत गर्नकाल लागि वातावरण बनाउन नेपाल सरकार तयार हुनेछ भन्ने अपेक्षा आम नागरिकले लिएका छन् ।
हामी पनि नेपाल र चीनबीचको युगौंदेखिको सम्बन्ध निरन्तर र परिणाममुखी रहोस् भन्ने अपेक्षा राख्दछौं । तसर्थ, पनि नेपाललाई लामो समयदेखि नजिकबाट नियालिरहेका परराष्ट्रमन्त्री, राष्ट्रपति सि पिङका प्रिय पात्र पनि हुन् । यो परिवेशमा नेपालको भू–राजनीतिक चलायमान भइरहेको अवस्थामा बेइजिङबाट जुन सन्देश बोकेर वाङको आगमन हुँदैछ, त्यसलाई नगदको रुपमा उपयोग हुनेछ भन्ने ठम्याई हाम्रो रहेको छ ।