पार्टी प्रवेश

सुजम्बर सम्भव
सल्लेरी, सोलुखुम्बु

खादाहरु उनका गलामा मुस्कुराईरहन्छन्
अबीरहरु उनका गालामा फक्रीरहन्छन्
हातहरु उनका हातसित मिल्न आईरहन्छन्,
फरक यति हो,
ती खादा र अबीरहरु
पसलमा रहेसम्म साहुको हुन्छ,
किने पछि किन्नेको हुन्छ
त्यो कुनै बेला पार्टीको हुन्छ
कुनै बेला साथीको हुन्छ
तर लाएपछी न लाउनेको हुन्छ, न लाईदिनेको ?
खादा आफैँमा अन्योलमा छ कि ऊ कसको हो ?
लाउने झन अन्योलमा छ कि उसले के लगाएको हो ?

अकारण,
जर्साबको आदेशमा अतालिए झैं
बडाहाकिमको सामु लठ्ठीए झैं
बाघको सामु परेको बबुरो हरिण झैं
सर्पको सामु परेको भ्यागुतो झैं
बासुरीको धुनमा लठ्ठीएको नागिन झैं
आफ्नै रापले डढेको सुर्य झैं
डढिररहन्छ निरन्तर…
लठ्ठीरहन्छ निरन्तर…
आत्तिरहन्छ निरन्तर…

के गरोस त बिचरा ?
एक गाँसले उसलाई बिटुलो बनाएको छ,
एक थान आशले उसलाई अनिदो बनाएको छ,
त्यसैले मौसम अनुसार पार्टी फेरिरहन्छ ।
भनिरहन्छ निरन्तर…
लालसलाम…
अभिवादन…
संघीय अभिवादन…
जय नेपाल…