राष्ट्रिय स्थायित्वका लागि गठबन्धन !

स्पष्ट दुई तिहाइ नजिकको सरकारले जनताका भावनाहरुलाई लत्याए पश्चात् कांग्रेस लगायतका पाँच दलले गठबन्धनतिर आफूलाई उभ्याए । जसको कारण नेपाली राजनीति जनताले नसोचेको मोडमा उभिन पुग्यो ।
झण्डै १ वर्षदेखिको यो गठबन्धनको रटान अहिले आएर तुहिने पो हो कि भन्ने आशंकाहरु निम्तिरहँदा नेपाली कांग्रेसले आफ्नो केन्द्रीय समितिको बैठकबाटै गठबन्धनलाई मूर्त रुप दिने निर्णयमा पुग्नु स्वागतयोग्य कार्यका रुपमा लिनुपर्छ । गठबन्धन तोड्नका लागि विभिन्न किसिमका आरोह अवरोह नजन्मिएका होइनन् । संसदबाट एमसिसि अनुमोदन लगायतका विविध एजेण्डाहरु ल्याएर गठबन्धन तोड्नका लागि खेलिएको अवाञ्छित गतिविधिहरु अन्ततः निरिह सावित भएका छन् । जसले आसन्न निर्वाचनलाई महत्वपूर्ण रुपमा लिएको छ ।
नेपाली कांग्रैस सम्बद्ध नेताहरुले आफ्नो अभिव्यक्ति राख्ने क्रममा गठबन्धनलाई महत्व दिएकै कारण गठबन्धनको भविष्य सुनिश्चित भएको हो । आसन्न वैशाख ३० गतेको निर्वाचनमा सत्तारुढ दल लगायत ५ दलीय गठबन्धनले अन्ततः निरन्तरता पाउनुले अस्थिरताको राजनीतिबाट मुलुकले उन्मुक्ति प्राप्त गर्ने आशा पलाएको छ । वास्तवमै प्रधानमन्त्री शेरबहादुर देउवाले जुन सफलता प्राप्त गरे, त्यो कांग्रेस एक्लैको जोड जुलुमले प्राप्त भएको थिएन । विपक्षी बेन्चमा बसेर निरिह बन्नुको गुञ्जाइस् नभएको अवस्थामा एकाएक दुई तिहाइको उन्मादबाट विचलित हुन पुगेको ओली सत्ताले जनमतलाई लत्याउने काम ग¥यो र संसद विघटन गर्न पुग्यो । जनमत लत्याउने जुन घृणित खेलभित्र कम्युनिष्ट र गैर कम्युनिष्टहरु एक ठाउँमा जोडिन पुगे । जसले उन्माद चढेको ओली सत्ताको चुरिफुरिलाई छिनभरमै आर्यघाटमा सेलाइदिए । त्यसबाट प्राप्त गरेका उर्जालाई शेरबहादुर देउवाले पार्टी संगठन निर्माणमा चलाखीपूर्ण ढंगबाट उपयोग गर्न पछि परेनन् । जसको कारण नेपाली कांग्रेस केन्द्रीय समितिको बैठकले गठबन्धनलाई निरन्तरता दिने निर्णयमा पुग्यो ।
जसबाट बजारमा आएका गठबन्धन विरोधी अभिव्यक्तिहरुलाई फिक्का बनाउने काम मात्र गरेन, अब विपक्षीको एउटा भरासिलो साधनको अन्त्य समेत गरिदियो । यसले सत्ताको उन्मादमा तिल्मिलाउन पुगेको ओली सत्तालाई चोटिलो धक्का लागेको छ भने आशंकको बिचबाट शंका निवारण हुँदै ५ दलीय गठबन्धन आफू मजबुत भएको आभाष मिलेको छ । यो अवस्थामा उत्पन्न राजनीतिक विचलनलाई अन्त्य गर्दै प्रजातान्त्रिक मूल्य र मान्यताको उच्च सम्मानका साथ गठबन्धन अगाडि जानेमा अब शंका रहन्न भन्ने विश्वास हामीले लिएका छौं ।
त्यसैले यो गठबन्धन चुनावी प्रक्रियाका अन्तिम क्षणसम्म स्थायित्व कायम गर्दै नेपाली जनतामा आएको राजनीतिक दलप्रति हेर्ने नकारात्मक सोचलाई सकारात्मक अवस्थामा बदल्न सक्नेछ भन्ने ठम्याई हामीले लिएका छौं ।