गजल

जिज्ञासु पौडेल तिलक, बुटवल
हाल काठमाडौं

निस्केर जान्छ सारा खुसी छोडेर, सारा पीर छोडेर
आखिर कहाँ जाँदोरहेछ मुर्दाको सास शरीर छोडेर ?

बुद्धिमान भनौं कि अबुझ भनौं म ती जानेहरूलाई ?
सजिलै बिर्सिन आदेश दिन्छन् मुटुमा तस्वीर छोडेर

केही त दिएको छ मलाई स्वार्थी कसरी भनु उसलाई
आफु धनुष मात्र लिएर गयो यो छातिमा तीर छोडेर

माथि पुग्नेको अहम् जति हुन्छ त्यत्ति हुन्छ डर पनि
खस्यो भने त पाउमै पुग्छ नि टोपी पनि शिर छोडेर

मलाइ थाहा छ उस्को बाउ खान नपाएर मरेको हो
छोरो आएकोछ आज खोलाको तिरमा खीर छोडेर