“हर्क”

युवराज खतिवडा
बुद्धशान्ति–३, झापा

ओ ! हर्क
तिमीलाई त धराने हर्क मात्रै
भन्ने सोचेका थियौँ हामीले
तर तिमी त थाहै नपाई
जम्मै नेपाली मनको
हर्क पो बनिसकेछौ
तिमीले त अग्रगमनको
बाटो पनि समाती सकेछौ
मन मुटु समर्पित गरी
देशको माटो पनि समाती सकेछौ

ओ ! हर्क तिमी कुन हर्कले
आएका थियौ ?
तिमी झैँ हाकिमहरू मस्त सुतिरहँदा
चिया पसलहरूमा मात्रै गफिईरहँदा
किन तिमीलाई मात्र झिसमिसेमा
उठेर कुद्न हतार भइरहन्छ?
कहिले पानीको पाइप बोकेर
पहाडको भिरैभीर दौडिन्छौ
कहिले ढुंगा माटो बोकेर
खोलाको तिरैतिर दौडिन्छौ
कहिले फलफूलका बिरुवा रोप्न
धरानको शिरैशीर दौडिन्छौ

ओ हर्क ! तिमीले त
घरी स्वयंलाई कुल्ली बनाएर
घरी स्वयंलाई मदजूर बनाएर
घरी किसान बनाएर
आफूलाई मेयरको कुर्सीमा
बसाल्न पनि बिर्सिएछौ
तिमीले त कुन हर्कले हो कुन्नी
आराम गर्न पनि बिर्सिएछौ
तिमीलाई मात्र किन हो
देशको पीर लाग्ने !
तिमीमा मात्र किन हो
जनहरूको माया जाग्ने !

ओ ! हर्क भनन सबै मुखले बाँसुरी
बजाईरहँदा
किन तिमी कामको बाँसुरी बजाइरहेछौ
सबै आराम गरिरहँदा किन तिमी मात्र
पसिना बगाइरहेछौ
अरुले ब्यक्तिगत स्वार्थ बोकिरहँदा
किन राष्ट्रिय स्वार्थकोलागि मरिमेटिरहेछौ
अरुकै जस्ता
तिम्रो पनि घर गृहस्थी छ होला नि
अरुकै जस्ता
तिम्रा पनि बाउआमा छन् होला नि
तिम्रा पनि लालाबाला छन् होला नि
अरुकै जस्ता ;
ठूलो कुर्सीका नेताले
बैदेशिक ऋण खाए जस्तो
खाऊँ भन्ने लालच आउँदैन तिमीमा ?
हाकिमहरूले टल्किने टिपटप
टाइसुट लाएजस्तो
लाऊँ भन्ने कत्ति रहर
पलाउँदैन तिमीमा ?
अरु कुन माटोले बनेका थिए
अरु कुन धर्तीमा जन्मेका थिए
तिमीमा यो माटोको सुवास आइरहँदा
तिमीलाई पसिनाको मिठास लागिरहँदा
हेर त तिमी जस्तै देखिने हाकिमहरू
चिल्ला चिल्ला चील गाडीमा दौडिरहँदा
तिमीले त अफ्नो गाडी
चड्न पनि बिर्सिएछौ
गाडीमा हावा खाएर रिवन काट्न
दौडिने बेलामा आफ्नै गाडी बेचेर
बाटो बनाउन रोलर किनेछौ
अरु सानमा कुदिरहँदा
तिमी भने साइकलमा कुदिरहेछौ
तिमीले त अफ्नो रहर पनि बेचिसकेछौ
तिमीले त आफूलाई पनि बिर्सी सकेछौ
तिमीले त आफ्नै नाम हराइसकेछौ

ओ ! हर्क
अब तिमी तिम्रा बाउआमाको मात्र हर्क रहेनौ
तिमी तिम्रा आफ्नाहरूको मात्र हर्क रहेनौ
तिमी त सारा नेपालीको हर्क बनिसकेका छौ
ओहो! तिमी त कति चाँडै
धरानको सान बनिसकेछौ
अब तिमी धरानको मात्रै हैन
यो देशको सान बन्नुपर्छ
तिमीले देशको शीर उँचो बनाउनु पर्छ
यो देशको गौरव बन्नुपर्छ
सम्पूर्ण नेपालीको गौरव बन्नुपर्छ
ओ ! जनमनको हर्क
तिमीलाई मेरो सलाम छ
तिमीलाई हाम्रो सलाम । जय नेपाल ।