स्थानीय सरकारको मर्म विपरित जाने छुट छैन

नेपाली जनताको लामो संघर्षपछि प्राप्त भएको सार्वभौमसत्ता जनतामा निहित व्यवस्थामा जुन किसिमका तरंगहरु देखिएका छन्, त्यसले ति बलिदानीपूर्ण योद्धाहरुप्रति न्याय गर्नेछैन ।
जसको संकेत संघीय संसददेखि स्थानीय सरकारसम्मका सञ्चालकहरुले गर्ने गतिविधिले संकेत गरिरहेको छ । संघीय संसदमा जे–जस्ता दृष्यहरु सल्बलाएका छन्, त्यसका बाछिट्टाहरु स्थानीय सरकारमा पनि देखिएका छन् । ७ सय ५३ वटै पालिकाहरुले स्थानीय सरकार सञ्चालन मर्म विपरित यो या त्यो नाममा देखिनुले संघीय व्यवस्थामाथि नै प्रश्न चिन्हहरु खडा गरेको छ । स्मरण रहोस्, स्थानीय पालिकाहरुमा विपक्षीको अवधारणा संविधानमै छैन तर राजनीतिक पार्टीहरुले आफ्नो स्वार्थ पूर्तिका लागि यो या त्यो बहानामा भूमिका खेलिरहेको ज्वलन्त उदाहरण पनौती नगरपालिकाले देखाएको छ ।
पालिकाको कार्यपालिका बैठकमा देखिएको ध्रुवीकरणले यि आशंकाहरुलाई पुष्टि गर्दछ । यो गम्भीर अवस्थातर्फ नगरवासीले खबरदारी गर्न जरुरी छ । अन्यथा झिंजाले मुडो डढाउँछ भनेझैं भुसभित्रको आगोझैं संघीय व्यवस्था नै धरासयी हुनेमा दुई मत नरहला । तसर्थ, यस किसिमका छिनाझम्टीलाई निरुत्साहित गर्नका लागि नगरभित्र रहेका बुद्धिजीवि, नागरिक अगुवाहरुले अहम् भूमिका निर्वाह गर्नु अपरिहार्य भएको छ । यो अवस्थालाई मनन गर्दै संविधानमै उल्लेख नभएका घटनाक्रमहरुलाई स्थापित गर्न खोज्नु पक्कै पनि बुद्धिमत्ता होइन । यो या त्यो बहानामा राजनीतिक पार्टीहरुले संविधानलाई शिरोपर गर्दै स्थानीय सरकार सञ्चालनका लागि तयार भएको कार्यविधिभित्र रहेर नागरिकहरुलाई सेवा सुविधा र सम्वृद्ध पालिका बनाउन अग्रसर हुनु नै आजको आवश्यकता भएको छ ।
अन्यथा संयुक्त जनआन्दोलन र १० वर्षे जनयुद्धबाट प्राप्त सीमित अधिकारहरु स्खलित हुँदै जाने खतरा बढेको छ । यसले पक्कै पनि यो संविधानको संरक्षक भएर आएका राजनीतिक पार्टीहरुलाई आघात पु¥याउने छ । यो डरलाग्दो परिवेशमा राजनीतिक भन्दा पनि राष्ट्रियताका सवालमा एक कदम माथि उठ्नु सबै राजनीतिक पार्टीहरुको बुद्धिमत्ता देखिन्छ । त्यसैले दिनप्रतिदिन टाढिएका दूरीहरुलाई सामिप्यतामा ल्याई झिना–मसिना अन्तरविरोधहरुलाई एकआपसमा समझदारिता कायम गरी अन्त्य नगरिएमा समस्याको रुपमा विकराल स्थिति सिर्जना नहोला भन्न सकिँदैन । त्यसैले स्थानीय सरकार सञ्चालनमा संविधानले निर्दिष्ट गरेको दायराभन्दा बाहिर जाने छुट कसैलाई पनि नभएको निचोडमा हामी पुगेका छौं ।