सत्ता प्रतिपादक बन्नुहुन्न

नेपालको राजनीतिक घटनाक्रमलाई लिएर विश्व रंगमञ्चमा टिकाटिप्पणी उठिरहँदा द्वन्द्वको पिडामा तड्पिएको मुलुकलाई मलमपट्टि लगाउन भएको शान्ति सम्झौताको मर्ममाथि नै प्रहार गर्ने किसिमबाट घटनाक्रम अगाडि बढ्नु शोभनीय होइन ।
परिवर्तनको महान् उद्देश्य बोकेर युद्धमा होमिएको तत्कालिन माओवादी र सात राजनीतिक घटकबीच भएको सम्झौता विरुद्ध संवैधानिक अदालतले उठाएको कदमप्रति आलोचनाहरु एकपछि अर्काे गर्दै बढेका छन् । विश्वका कुनै पनि हिंसात्मक राजनीतिक घटनाहरुलाई हेर्ने हो भने यो कदम कुनै कोणबाट पनि न्यायोचित मान्न सकिन्न । जसले शान्ति सम्झौताप्रति नै दूरगामी असर पार्ने निश्चित छ । यसबाट बुझेर पनि बुझ पचाउने न्यायलय र राजनीतिक रुपमा प्रशिक्षित बुज्रुकहरुले मुलुकलाई फेरि हिंसात्मक बाटोतर्फ धकेल्न खोजेको त होइन भन्ने आशंकाहरु उब्जिएका छन् । राजनीतिक रुपमा आफूलाई राजावादीको कसीमा राख्ने राप्रपा नामको पार्टीले संसदमा जुन भूमिका खेलिरहेको छ, उसले दरबार हत्याकाण्डलाई एक पटक नजरअन्दाज गर्न जरुरी छ । नौ हजार शाही सेनाको घेराभित्र रहेको राजसंस्थाको अवशेष समेत बाँकी नरहने गरी भएको नरसंहारको जिम्मा कसले लिने ? भन्ने सवालमा चर्चा उठ्न जरुरी छ । के त्यो हत्याको बारेमा तैं चुप मै चुप भएर ढाकछोप गर्न मिल्छ ? राजनीतिक एजेण्डा लिएर आन्दोलनमा होमिएको निशस्त्र शक्तिमाथि शक्तिको दुरुपयोग गरेर भएको आततायी घटना एकातिर छ भने मुलुकको सिंगो बागडोर सम्हालेको राजसंस्थामाथि भएको नरसंहारको घटनालाई छोप्न खोज्नु आफैंमा विवादास्पद छ ।
यसर्थ, यि दुई घटनाक्रम त प्रतिनिधि पात्र मात्रै हुन् । आमुल परिवर्तनका खातिर यस्ता घटनाहरु यो मुलुकमा धेरै घटेका छन् । तिनीहरुलाई कसरी बुझ्ने त्यसमा भर पर्छ । यावत् राजनीतिक घटनाक्रमलाई लिएर धमिलो पानीमा माछा मार्न खोज्नु र १० वर्षे जनयुद्धलाई दोषी चस्माको रुपमा हेर्नु केही भिन्न होइन भन्ने ठम्याइमा हामी पुगेका छौं । राजनीतिक घटनाक्रममा जुन किसिमका पात्रहरु जन्मिरहेका छन्, त्यसले मुलुकको सम्वृद्धि होइन, उँभो गतितर्फ धकेलिरहेको बुझाइ हाम्रो छ ।
यस किसिमका गतिविधिबाट मुलुकलाई माथि राख्नु प्रत्येक राजनीतिककर्मीको दायित्व हो, जिम्मेवारी हो । त्यसैले राजनीतिक परिवर्तनका खातिर भएका घटनाक्रमहरुलाई अतिरञ्जित बनाएर मुलुकलाई अस्थिरतातर्फ धकेल्ने छुट कसैलाई छैन भन्ने निचोडमा हामी पुगेका छौं । यस घडीमा जनअपेक्षा सहित राजनीतिक घटनाक्रमले स्थापित सत्ता प्रतिपादक नबनोस् भन्ने अपेक्षा हामीले राखेका छौं ।