विद्यालयमा नैतिक शिक्षाको आवश्यकता

सामुदायिक वा संस्थागत ढंगबाट सञ्चालन भएको विद्यालयको प्रमुख उद्देश्य भनेको विद्यार्थीको भविष्य निर्माण गराउनु हो । विद्यालय उमेरका बालबालिका भनेको काँचो माटो हो ‚ विद्यालयमा कार्यरत शिक्षक काचो माटो रुपी विद्यार्थीको भविष्य निर्माणको खातिर ज्ञानको खुराकी पस्कने माध्यम हो । कुमालेले काँचो माटोलाई विभिन्न रुप दिन जसरी सफल हुन्छ सोही ढङ्गको भूमिका शिक्षकले खेल्न जरुरी रहन्छ । कुमालेले चक्रको माध्यमबाट काँचो माटोलाई जसरी विभिन्न महत्वपूर्ण रुप दिन सफल हुन्छ शिक्षकहरूले पनि पाठ्यपुस्तकको माध्यमबाट कलिलो र खाली दिमाग भएका काँचो माटो रूपी विद्यार्थीको भविष्य निर्माणमा भूमिका खेल्न जरुरी रहन्छ ।
विद्यालयमा विद्यार्थीहरूले पाठ्यपुस्तक मात्रै रटान गरेर पुग्दैन ‚ उनीहरूले नैतिक शिक्षा ‚ सामाजिक शिक्षा साथै व्यक्तित्व विकासमा ठुलो फड्को मार्ने ढङ्गको वातावरण निर्माण गर्न जरुरी रहन्छ । पछिल्लो समयमा सामाजिक सञ्जाल दुरुपयोगले गर्दा विद्यार्थीहरूमा विभिन्न खाले विकृतिहरुको शिकार हुनेक्रम बढेको छ । उनीहरूमा नैतिक शिक्षा ह्रास हुँदै गएको छ जसको कारण विभिन्न खाले घटनाहरू दिन पर दिन बढ्दो छ । विद्यालयमा हुने सामान्य गतिविधिलाई विद्यार्थीहरूले सहन सक्ने क्षमतामा समेत ह्रास हुँदै आएको छ ।
शिक्षकहरूले पठन पाठनको क्रममा सामान्य ढङ्गको यातना दिदा समेत सो कुरालाई ठुलो विवाद निम्त्याउने कार्य समेत हुँदै प्रहरी प्रशासन समेत गुहार्ने कामले गर्दा शिक्षकहरुमा मनोबल गिर्ने गरेको छ । जसको कारण अध्यापनको क्रममा अनुशासन पालना गराउने विषयमा समस्या आएको छ । यस्ता तमाम समस्या हुनुको पहिलो जटिल कारण भनेको विद्यार्थीमा नैतिक शिक्षाको अपुग हुनु हो । विद्यालयमा भएको सामान्य गतिविधिलाई विद्यार्थीहरूले आफ्नो अभिभावक समक्ष प्रस्तुत हुँदै गर्दा अभिभावकले मसिनो ढंगले कमीकमजोरीको पहिचान नगरी विद्यार्थीको भनाइको भरमा पछि लाग्दा थप समस्याहरू निम्तने भएकोले घरमा समेत व्यवहारिक साथै नैतिक शिक्षा दिन जरुरी रहन्छ ।