अनावश्यक राष्ट्रमाथि भार थप्नु गलत हो

राष्ट्रिय गौरवका नाममा नेताहरुको स्वार्थ जोडेर आउने आयोजनाहरुले राष्ट्रिय अर्थतन्त्रलाई नै धरासयी बनाएको छ ।
नेपालमा पछिल्लो समय विभिन्न गौरवका नाममा आफ्ना अनुकुलता अनुसारका आयोजनाहरु सञ्चालन गर्ने होडबाजी चलेको छ । जसको कारण समग्र मुलुकको अर्थतन्त्र तहसनहस हुन पुगेको छ । त्यसैले कुनै पनि आयोजनाहरु प्रस्ताव हुनुपूर्व त्यसको लागत र लाभान्वितका विषयमा गम्भीर रुपमा अध्ययन हुन जरुरी छ । पछिल्लो समय भैरहवास्थित गौतम बुद्ध अन्तर्राष्ट्रिय विमानस्थलका बारेमा जन्मिएका अनगिन्ती प्रश्नहरु र अव्यवहारिक गतिविधिले त्यसको लागतमाथि प्रश्नहरु उठाइरहेका छन् ।
विमानस्थल बनाउन ठूलो कुरो भएन, त्यो विमानस्थल सञ्चालनका लागि आइपर्ने चुनौतीका बारेमा विश्लेषण गर्न नसक्नु गम्भीर त्रुटि हो । यदि समयमै हवाइमार्गका बारेमा जानकारी प्राप्त गरेको भए आज भारतसँग बिन्तीभाउ गर्नुपर्दैन थियो । जसका कारण मुलुकको अरबौं रुपैयाँ अर्थहिन ठाउँमा प्रयोग हुन पुग्यो, राज्यले ठूलो आर्थिक भार व्यहोर्नु प¥यो । हाम्रो देशमा कस्ता खालका कन्सल्टेन्सीहरु छन्, जसले कस्तो खालको डिपिआर बनाउँदा रहेछन् भन्ने उदाहरण गौतम बुद्ध अन्तर्राष्ट्रिय विमानस्थलको हविगतबाट पुष्टि हुन्छ । त्यस्तै पोखरा अन्तर्राष्ट्रिय विमानस्थलमा आज विमानहरु अवतरण भएनन् भनेर व्यवसायीहरु आन्दोलन गर्ने धम्की दिइरहेका छन् । यो केको परिणाम हो ? गम्भीर हुन जरुरी छ कि छैन ? यसतर्फ सम्बन्धित सरोकारवाला निकायले सोच्न आवश्यक देखिएको छ ।
यो अवस्था एकातिर सोचनिय विषयको रुपमा अगाडि आइरहेको छ भने अर्काेतर्फ अन्तर्राष्ट्रिय स्तरको निजगढ विमानस्थल निर्माणको प्रक्रिया अगाडि किन बढाइएन भनेर आवाजहरु उठ्नु कतिको न्यायसंगत हुन्छ ? यसतर्फ सम्बन्धित सरोकारवाला पक्षको ध्यानाकर्षण हुन आवश्यक छ । यदि अरबौंको लगानीमा तयार हुने यस्ता विमानस्थल सञ्चालन हुनै नसक्ने हो भने बेकारमा किन खर्च गरिरहने ? अरबौंको लगानीमा बनेका संरचना सेतो हात्तीको रुपमा परिणत हुने हो भने त्यस्ता विमानस्थलहरु बनाउनु नै किन ? फेरि हाम्रो देशमा बनेका विमानस्थलमा विमान उडाउन छिमेकी देशसँग हात जोडेर हवाइमार्ग उपलब्ध गराउन बिन्ती गर्नुपर्ने र त्यसो गर्दा पनि अनुमति नपाउने अवस्था ज्यूँकात्युँ रहेको छ । अहिलेको अवस्थामा अनावश्यक अरबौंको लगानी गरेर निजगढ विमानस्थल बनाउन दबाब दिनु कमिशनको खेलभन्दा अर्काे कुनै स्वार्थ देखिँदैन । जसले जे गर्दा नि हुने भए किन नीति, नियम र कानूनका कुरा उठ्छन् ? त्यसैले त्यसतर्फ सरोकारवाला निकायले गम्भीरतापूर्वक राष्ट्रिय गौरवका नाममा आएका आयोजनाहरुका बारेमा सुक्ष्म र निर्मम किसिमले अध्ययन हुन आवश्यक छ ।
यस्ता किसिमका आयोजनाहरु कार्यान्वयन हुनुपूर्व जनस्तरबाट गहिरो अध्ययन हुन आवश्यक छ । तब मात्रै आयोजनाका बारेमा अगाडि बढ्न सक्यौं भने मात्र सोचेजस्तो परिणाम लिन सक्छौं । त्यसैले यस किसिमका आयोजनाहरुले अनावश्यक रुपमा राष्ट्रलाई आर्थिक भार बोकाउने छन् । यि र यस्ता किसिमका आयोजनाहरु नेपालको परिवेशमा उपयुक्त छैनन् भन्ने निचोडमा हामी पुगेका छौं । आशा छ, सरोकारवाला निकायले यि र यस्ता विषयमा गल्ती गर्ने छैन ।