प्रतापले यो चुनौती चिर्नुपर्छ

हालै सम्पन्न काभ्रे उद्योग वाणिज्य संघको ४२औं सभाबाट नेतृत्वमा पुग्न सफल व्यवसायी प्रताप वैद्य चुनौती र आलोचनाको घेरामा रहेका छन् ।
व्यवसायीहरुको छाता संगठन भनेर चिनिएता पनि व्यवहारतः यो संगठन एउटा झुण्डको पेरिफेरिमा रहेको निर्वाचन परिणामले देखाएको छ । लामो समयदेखि संकीर्णताको बिचमा मौलाएको एउटा गैससभन्दा माथि उठ्न नसकेको आरोपको भागिदारी काभ्रे उद्योग वाणिज्य संघले खेप्दै आएको छ । यो आरोपलाई सदाको लागि अन्त्य गर्दै व्यवसायीहरुको छाता संगठनको रुपमा काभ्रे उद्योग वाणिज्य संघलाई परिचित र स्थापित गराउने दायित्व प्रताप वैद्यको काँधमा व्यवसायीहरुले सुम्पेका छन् । यो चुनौतीबाट माथि उठ्न त्यति सजिलो भने पक्कै छैन । २५ सदस्यीय कार्यसमितिमा ९५ प्रतिशत बनेपा बजारकै उपस्थितिले आरोपलाई मिथ्या भन्न मिल्ने छैन ।
त्यसैले यि आरोपहरुबाट संघलाई मुक्त राख्नका लागि व्यवसायीहरुबिचको संकीर्णता चिर्न त्यति सजिलो पनि छैन । यो अवस्थामा गरिमामय अध्यक्ष पदमा आसिन वैद्यका लागि परिवर्तन फलामको चिउरा सरह हुने देखिन्छ । यो परिवेशमा उद्योग वाणिज्य संघ साँच्चै काभ्रेली व्यवसायीहरुको छाता संगठनको रुपमा विकास गराउनका लागि विधान नै संशोधन हुन आवश्यक छ । विधान संशोधन गर्नका लागि त्यो किसिमको बौद्धिकता पनि आवश्यक पर्दछ भने सर्वसम्मत स्वीकार्य गराउनका लागि पनि उहाँ आफैं अल्पमतमा हुनुहुन्छ । यो समयमा संयमताको खाँचो छ । त्यसलाई मनन् गर्दै अध्यक्ष वैद्यले बजारमा सुनिएका आलोचनाहरुलाई अन्त्य गर्नका लागि पहिलो उहाँको काम भनेकै विधान संशोधन गरेर सर्वमान्य सिद्धान्तअनुसार भोलिको नेतृत्व चयन हुने वातावरण बनाउनु नै बुद्धिमतापूर्ण देखिन्छ ।
काभ्रे उद्योग वाणिज्य संघ समग्र काभ्रेली व्यवसायीहरुको छाता संगठनको रुपमा स्थापित गर्न सकुन् । अध्यक्ष वैद्य र निर्वाचित सिंगो टिमलाई हाम्रो साधुवाद छ । आशा छ, आगामी २ वर्षपछिको नेतृत्व चयन भइरहँदा बजारमा अहिले छचल्किएका आलोचनाहरु आउने छैनन्, एक कुशल नेतृत्वको रुपमा यो नेतृत्व स्थापित होस् भन्ने कामना हामीले गरेका छौं ।