अलिखित अक्षर

वेदिका वन्दना

शिलापत्रको अलिखित अक्षर हुँ,
म,
इतिहासको कोर्रा खाएर
वर्तमानमा,
जिउँदो सहिद् हुनुछैन मलाई !

मीठो लाग्छ नी,
जिन्दगीका पानाहरुमा
अनंकित हुनुको पीडादायी वोध,

वन्दिगृहको भित्तामा नखोपिएको
ताडनाको इतिहास पनि त !
छातीको भित्तामा चर्किएकै छ,

चिच्याउँन मन लाग्छ मलाई,
बलात्कृत इतिहासको चित्कार
वधशालाको नायक सामू
!!र!!
आत्माहत्या गर्दैछु म
फैसलाको पूर्णपाठ नआउँदै
किनकी
रक्ताङ्कित शिलापत्रहरुमा,
मेरो अनंकित इतिहास,
पढ्नु छैन मलाई!!

रक्ताङ्कित शिलापत्रहरुमा,
मेरो अनंकित इतिहास,
पढ्नु छैन मलाई !!