आन्तरिक पर्यटन स्थानीय विकासको मेरुदण्ड कायम गर

प्राकृतिक तथा धार्मिक महत्व बोकेका स्थानीय तहसँग जोडिएका कुनै पनि क्षेत्रहरु स्थानीय पर्यटनको गन्तव्य बन्न सक्छन् । त्यसका लागि स्थानीय सरकारले छुट्टै नीति बनाएर विकास र प्रवद्र्धनका लागिपर्नुपर्ने आजको आवश्यकता भएको छ ।
काभ्रेका विभिन्न पालिकाभित्र रहेका अनुसन्धानको दायरामा ओझेल परेका आन्तरिक पर्यटकीय हिसाबले अत्यन्तै महत्व राख्ने गन्तव्यमध्ये ताराखसे लेक (पोखरी) समुन्द्री सतहबाट २५ सय ५० मिटरको उचारमा रहेको हुँदा यो पोखरीमा जनैपुर्णिमाको दिन विशेष मेला लाग्ने गर्छ । यस वर्ष पनि यहाँ विशेष मेला लागेसँगै मेला भर्न टाढा–टाढाबाट सयौंको संख्यामा भक्तजनहरु आएको तथ्य हामीबाट लुकेको छैन ।
त्यस्तै गोसाईंस्थान (गोसाईंकुण्ड) को नामबाट परिचित धार्मिकस्थलमा पनि यस पटक नसोचेको श्रद्धालुहरुको उपस्थितिले स्थानीय जनप्रतिनिधिलाई सोच्न बाध्य बनाएको छ । धार्मिक आस्थाप्रति दिनप्रतिदिन बढेको जागरुकतालाई सामाजिक विकासको सिद्धान्तमा लगेर जोड्ने दायित्व स्थानीय सरकारको हो । यसतर्फ स्थानीय सरकारको गम्भीर ध्यानाकर्षण हुन जरुरी छ । भनिन्छ, किंवदन्ती अनुसार प्राचीन समयमा आकाशबाट तारा खसेको ठाउँमा पानीको उत्पत्ति भई पोखरी बनेपछि सोही ठाउँको नाम तारा खसे पोखरी रहन पुगेको किंवदन्तीमा उल्लेख गरिएको छ । पोखरी वरिपरि यति धेरै घना जङ्गल छ तर पोखरीमा रुखबाट झरेको पात एउटा पनि देख्न पाइन्न । हेर्दा जत्ति नै कालो पानी देखेता पनि तर अञ्जुलीमा लिंदा निर्मल स्वच्छ पिउन योग्य हुन्छ । कतिपय बाटोमा हिड्ने बटुवा, गोठाला र घाँस दाउरा जानेहरु यही पोखरीको पानी पिई आफ्नो प्यास मेटाउँछन् । अग्लो शिरमा अनौठो किसिमले पानी पोखरी बन्नुमा दैविक शक्ति रहेको विश्वास राख्न सकिन्छ ।
त्यस्तै यस घना जंगलमा विभिन्न किसिमका हजारौ प्रकारका जडिबुटीहरू समेत रहेको स्थानीयहरुले बताइरहँदा राज्य संयन्त्रको ध्यान गएर त्यसको संवद्र्धन र प्रवद्र्धनमा चासो दिनु आजको आवश्यकताभित्र पर्छ ।
त्यसैगरी काभ्रेका तीन धारा झरना, कमल पोखरी, घ्वाई झाङ, रानी पोखरी, म्हभीर, तारा खसे पोखरी, सीता पाइला, हात्ती आहाल जस्ता कयौं रमणीय ठाउँहरुलाई आन्तरिक पर्यटकको गन्तव्य बनाउनु स्थानीय सरकारको ध्यानाकर्षण गराउन चाहन्छौं । हाम्रो निचोड छ, आन्तरिक पर्यटन प्रवद्र्धन गर्न सकियो भने बेरोजगारको अन्त्य सँगसँगै समृद्ध स्थानीय पालिकाको लागि कोसेढुंगा सावित हुनेछ ।