मलाई गाउनु छैन स्वर्णयुगको गीत

वेदिका वन्दना

युगले सुनोस् !
वधशालाको भित्तामा नखोपिएको,
बर्बर यातनाको चित्कार,
सुनुन् !!
ऐतिहासिकहरुले पनि
शिलापत्रमा अनंकित,
मैले भोगेको अन्यायको इतिहास,
स्वाभिमानको गीत गाउँने
योद्धाहरुको छातिमा,
क्रुरताको कवाज खेल्ने जल्लादहरुको
निर्ममताको संगीत,
गुञ्जियोस !! गुञ्जियोस !!
र लेखियोस्
इतिहासको आदिम अक्षरहरुमा
विभत्स वधशालाको सजिवता,
किनभने
पढाउँनु छ वर्तमानलाई
मेटाइएको मेरो इतिहास !
भत्काउँनु छ
मलाई निमोठेर लेखिएको
वैभवता र गौरवताको
स्वर्णयुगीन इतिहास
जहाँ
मेरो इतिहासको भविष्य छैन
मेरो अतित छैन,
मेरो वर्तमान छैन,
त्यसैले त मलाई स्वर्णयुगको गीत गाउँनु छैन ।