‘एल्बम नै बिक्रि गरेर लगानीको एकचौथाई पनि उठ्दैन ।’ गोकुल रावत दोहोरी गायक

० आज भोलि के गर्दै हुनुहुुन्छ ?
कुमार दंगालको दोहोरी गीति एल्बम घर नारायणघाटैमा…. को गीत रेकर्डिङ सकिएर बजारमा आएको छ । जसमा मेरो र पार्वती कार्कीको स्वर रहेको छ । विभिन्न ठाउँहरुमा आयोजना हुने साँस्कृतिक कार्यक्रमहरुमा व्यस्त छु ।
० हालसालै बनेपामा आयोजित राष्ट्रिय पोशाक दिवसमा तपाइलाई देखिएन नि ?
पारिवारिक व्यस्तताले म कार्यक्रममा उपस्थित हुन सकिँन । कार्यक्रममा आफू सहभागी हुन नसकेकोमा म धेरै दुःखी छु । वास्तवमा राष्ट्रिय पोशाक दिवस मनाउने कार्यक्रमको सुरुवात गरिनु प्रत्येक नेपालीको लागि गर्वको विषय हो ।
० तपाइहरुको राष्ट्रिय संगीतकर्मी संघ काभ्रेले के कस्ता कार्यहरु गर्दैछ ?
राष्ट्रिय संगीतकर्मी संघ काभ्रेले विभिन्न स्थानहरुमा सांगितिक कार्यक्रम साथै सामाजिक सेजाका कार्यक्रमहरु गर्दै आएको छ तर अहिले आएर नेतृत्व पक्षको कमजोरीले गर्दा संगीतकर्मी संघ भित्रै एकआपसमा मतभेद देखिएको छ । यसको समाधानको लागि केन्द्रीय कमिटीले संगीतकर्मी संघ काभ्रेका सदस्यहरुलाई आउने शनिबारको लागि काठमाडौंमा बैठक बोलाएको छ ।
० तपाइहरुको राष्ट्रिय संगीतकर्मी संघको केन्द्रीय महाधिवेशन तत्कालै हुँदैछ हैन र ?
हो । आगामी माघ १०–११ गते केन्द्रीय महाधिवेशन हुँदैछ ।
० महाधिवेशनमा तपाइ पनि कुनै पदको लागि भिड्दै हुनुहुन्छ कि ?
म राष्ट्रिय महाधिवेशन संयोजक संघको उपाध्यक्ष हुँ । अध्यक्षमा चर्चित लोकदोहोरी गायक रेशम थापा हुनुहुन्छ । म अबको तीनवर्ष उपाध्यक्ष भएरै काम गर्नेछु त्यसपछि अध्यक्षको लागि भिड्नेछु ।
० अध्यक्षको लागि हाल को को भिड्दै हुनुहुन्छ त ?
हालसम्म त कसैको नाम आइसकेको छैन ।
० अहिलेसम्म तपाइले कुन कुन लोक दोहोरी गीती एल्बम बजारमा ल्याइसक्नुभएको छ ?
हालसम्म मैले नौवटा लोकदोहोरी गीति एल्बम बजारमा ल्याइसकेको छु । मेरो पहिलो एल्बम साँगा भञ्ज्याङ्ग हो । त्यसपछि पोल्छ मुटु मन, है सानु, चञ्चले यो मन, छड्के सलाम, सेतो घोडा, जितपुर फेदीगाउँ, गैह्रीखेत बजारमा आइसकेको छ ।
० धेरै दोहोरी गीत बजारमा ल्याएपनि है सानु …….. ले तपाइलाई चिनायो नि हैन ?
निश्चय नै मलाई लोकदोहोरी क्षेत्रमा लाखौं दर्शकमा चिनाउने र स्थापित गराउन गीति एल्बम नै है सानू हो । यो मेरो चौथो एल्बम हो । कहिल्यै दोहोरी गीत नसुनेका स्रोताहरुले पन यो गीतलाई मन पराएको पाएँ । रेडियो, एफएमहरुले पनि यो गीतलाई धेरै पटक बज्न दियो । यो गीति एल्बम मेरो लागि सफलताको सिंढी हुन पुग्यो ।
० एल्बम बिक्रिबाट राम्रै आम्दानी भयो होला नि ?
है सानू .. गीत त धेरै स्रोताहरुले मन पराइदिनुभयो तर एल्बम किनेर गीत सुन्ने स्रोता भने खासै भएन । एउटै ममोरी कार्ड र पेन ड्राइभमा सयौं गीत राख्न मिल्ने भएपछि कसले एल्बम किनेर गीत सुन्छ र ? मैले गायका सबै लोकदोहोरी गीतहरु चर्चित छन् र सबै स्रोताहरुको मोबाइलमा बज्ने गर्छन् । यो नयाँ प्रविधिले स्रोताहरुलाई फाइदा पुगेपनि कलाकारहरु चाहीँ मारमा परेका छन् ।
० के यो नयाँ प्रविधि उपयुक्त छैन र ?
समय परिवर्तनशील छ । आधुनिक प्रविधिसँगै सञ्चारक्षेत्र विस्तारित हुनु राम्रो हो । यो स्रोताहरुले पाउनुभएको सुविधा हो तर एउटा गीत ममोरी कार्ड वा पेन ड्राइभमा राखे बापत गायक तथा कलाकारलाई पनि केही रकम छुट्याइने व्यवस्था हुनुपर्छ ।
० के अहिले सबै गायक गायिकाको स्थिति नाजुक नै होला त ?
अहिले गायक गायिकाहरु स्रोताहरुसँगको सम्बन्ध नटुटोस् भनेर मात्रै र मिडियामा टिक्न मात्रै भएपनि गिती एल्बम निकाल्छन् । एल्बम नै बिक्रि गरेर त लगानीको चौथाई पनि उठ्दैन । एल्बम ननिकालौं यो क्षेत्रमा आइहालियो निकालौं त लगानीको रकम बालुवामा पानी हाले सरह मात्र हुन्छ ।
० तपाइले गाउनुभएका अधिकांश गीतहरुको रचना आफै गर्नुहुन्छ । कसरी रचना गर्नुहुन्छ शब्दहरु ?
गीत गाउनभन्दा गाह्रो हुन्छ गीतको रचना तथा शब्द चयन गर्न । लोकदोहोरी गीत भन्ने बित्तिकै माया प्रेम मिलन बिछोडका शब्दहरु प्रयोग गरिन्छ । धरैजसो गीतमा केटी मान्छेलाई सानू, सान्नानी, कान्छी, साइली… आदि इत्यादि शब्दले सम्बोधन गरिन्छ । गीतको लय मात्र राम्रो भएर हुँदैन शब्द राम्रो भएन भने गीत कमजोर हुन्छ । म कहिलेकाहीँ आधिरातमा उठेर पनि शब्दहरु लेख्ने गर्छु । मेरो साथमा सँधै कापी कलम हुन्छ र मनमा कुनै नयाँ शब्द आउनासाथ कापीमा टिपिहाल्छु ।
० आफ्नो गीतको म्युजिक भिडियोमा आफै खेल्नुहुन्छ किन ?
सुरुमा मैले आफ्नो गीतमा चर्चित कलाकाररु तथा मोडलहरुलाई खेलाउने विचार गरेको थिएँ तर उहाँहरुले खेल्न नमानेपछि म आफैले अभिनय गरेको हुँ ।
० एउटा गीत चर्चित हुन म्युजिक भिडियोको कत्तिको हात रहेको हुन्छ ?
समय पहिलाको जस्तो छैन । अहिले गीत सुन्नुको साथ साथै म्युजिक भिडियो हेर्ने चलन छ । म्युजिक भिडियो भएन भने गीत नै चल्दैन त्यसैले ५० हजार लगानी गरेर एल्बम निकाल्नेले दुईतीन लाख रुपिँयासम्म खर्च गरेर म्युजिक भिडियो बनाउँछन् ।
० तपाइका अधिकांश गीतहरु जस्तै, है सानू …, मारौली बुर्कुसी…, चञ्चले यो मन… इत्यादि नृत्य गर्न मिल्ने र भट्याएर गाउने खालका छन् । किन तपाइ यस्ता गीतहरु नै बढी गाउनुहुन्छ ?
भट्याएर गीत गाउने शैली ठेट नेपाली हो । यस्ता गीतहरु काँठ क्षेत्रमा अत्याधिक रुचाइन्छ र म सँधै यस्तै गीत गाउन रुचाउँछु । यस्ता गीत छिट्टै नै लोकप्रिय हुन्छन् । म नेपाली कला र सँस्कृति जोगाउने तथा गाउँघरमा नाचगान गर्न मिल्ने गीतहरु नै गाउने गर्छु । मैले गायका सबै गीतहरुमा धक फुकाएर नाच्न मिल्छ ।
० अहिले बजारमा अत्यधिक रुपमा दोहोरी गीतका एल्बमहरु आएका छन् यसलाई तपाइ कुन नजरले हेर्नुहुन्छ ?
दोहोरी गीतका एल्बमहरु बढ्नु त राम्रै हो तर जस्तो पायो त्यस्तै गीत जो सुकैले गाइदिँदा संख्याम बृद्धि भएपनि गुणात्मक कुनै सुधार हुन सकेको छैन । यसले दोहोरी गीतको स्तरलाई कमजोर बनाउँछ ।
० तपाइलाई धेरै जसो कार्यक्रममा गायिका पार्वती कार्कीसँग गीत गाएर नाचेको देखिन्छ नि ?
पार्वती कार्कीको स्वर राम्रो छ । मेरो अधिकांश गीतहरुमा उनैले स्वर दिएकी छिन् त्यसैले पनि धेरै जसो कार्यक्रमहरुमा पार्वती कार्कीसँग गीत गाएर नाचेको देखिएको हो । यसको अलावा हामी असल मित्र पनि हौं ।
० आफूलाई दोहोरी गायकको रुपमा चिनिन पाउँदा कस्तो लाग्छ ?
हुन त दोहोरी गायक भन्दा मान्छेहरु नाक खुम्च्याउँछन् तर मलाई आफू दोहोरी गायक र काभ्रेली भएकोमा गर्व लाग्छ । वास्तवमा भन्नुपर्दा नेपाली कला र सँस्कृति जोगाउने काम नै दोहोरी गीतले गरेको छ ।
० नेपाली फिल्म कत्तिको हेर्नुहुन्छ ?
समयले साथ दिएसम्म नेपाली फिल्म हेर्छु ।
० तपाइलाई मनपर्ने लोकदोहोरी गायकहरु को को हुन् ?
रेशम थापा र नवराज घोरसाइने ।
० अन्त्यमा केही भन्न चाहनुहुन्छ ?
म काभ्रेली ठिटो हुँ । म लोकदोहोरी क्षेत्रमा काभ्रेको नाम उच्च राख्न चाहन्छु । काभ्रेका साथीहरुले मलाई पूरा साथ दिनुभयो भने आगामी तीन महिनामा अर्काे एउटा गीति एल्बम पनि बजारमा ल्याउनेछु ।