युवा नै रुपान्तरणका वाहक हुन् देशलाई समृद्धितर्फ उन्मुख गराउने हो भने नेतृत्व युवाले पाउनुपर्छ- नेता सुवेदी

प्रल्हाद शर्मा हुमागाइ

पनौती/विश्वलाई कोभिड १९ ले आक्रान्त बनाइरहेको अवस्थामा पनौतीका युवाहरुले अनुकरणीय भूमिका निभाएको संविधान सभाका सांसद एवं नेकपाका नेता रामहरि सुवेदीले एक कार्यक्रम बिच बताउनुभएको छ ।

मुलुक लकडाउनको ३५औं दिन पार गरिरहँदा पनौतीका युवाहरुले दैनिक बिहान ४५÷५० बेलुका ४५÷५० विपन्न मजदुरहरुलाई खानाको व्यवस्थापन गरी विषम् परिस्थितिमा युवाहरुले अनुकरणीय योगदान गरेको तथ्य नेता सुवेदीले उजागार गर्नुभएको छ । सुवेदीका अनुसार युवा नै रुपान्तरणका वाहक हुन् । अबको नेतृत्व युवाले पाउनुपर्छ । यदि यस्तो हुन सकेन भने शहीदहरुले बगाएको रगतको अवमूल्यन हुने खुलासा समेत नेता सुवेदीले व्यक्त गर्नुभयो । असहाय, विपन्नहरुको दैनिकीलाई सहज रुपमा खानाको व्यवस्थापन गर्नु युवाहरुले प्रत्येक नागरिकलाई प्रेरणा जगाएका छन् । यसरी खाना खुवाउने क्रममा आठ वर्षको बालक देखि ७०÷७५ सम्मका वृद्धा समूहले सडकको जीवन व्यतित गर्नुले पनि अबको जिम्मेवारी युवाले पाउनुपर्ने नेता सुवेदीको तर्क थियो ।

अहिले नेपाल मात्र होइन विश्व नै जटिल परिस्थितिमा गुज्रिन पुगेको छ । यो अवस्थामा युवाहरुले संयमताका साथ आफ्नो भूमिकालाई उच्च राख्नुको विकल्प छैन भन्नुहुँदै नेता सुवेदीको थप कथन थियो– कुनै पनि नागरिकले अभिभावकत्व विहिन भएको अनुभूति गर्नु नपर्ने किसिमले युवाहरुले आफूलाई समर्पित गर्नुपर्ने नेता सुवेदीले जिकिर गर्नुभयो ।

सोही क्रममा विगत ३५ दिनदेखि अनवरत रुपमा खटिएका पनौती युवा मञ्चसँग आबद्ध युवाहरुको ढुकढुकी सौगात बस्नेतको कथन थियो– सहयोगी हातहरुको कारण आजका दिनसम्म दैनिक हामीले ४५ देखि ५० जनालाई साँझ बिहानको खाना व्यवस्थापन गर्दै आएका छौं । यसबाट पनौती युवा मञ्च सहयोगी मनहरुप्रति आभार व्यक्त गर्दै ति तड्पिएका आत्माहरुमा मलमपट्टि लगाउने कार्य भएको आफू र आफ्नो समूहले महसुस गरेको धारणा राख्नुहुँदै यसबाट पनौती क्षेत्रभित्र सडक पेटीमा रुमलिएका आत्माहरुका साथ बटुवाहरुको समेत आत्माले सन्तुष्टि प्राप्त गरेको बस्नेतको ठहर छ । बस्नेतका अनुसार यस किसिमको व्यवस्थापन गर्न नसकेको भए यो ३५ दिनको दौरानमा पनौतीमा अप्रिय घटनाहरु घट्न सक्थे । कतिको जीवनलिला अन्त हुन्थ्यो । यो अभियानले सडकमा पिल्सिएका धेरैले पुनर्जीवन पाएको बस्नेतको कथन थियो ।

पनौती युवा मञ्चले सुरुका दिनदेखि निरन्तर रुपमा आज ३८औं दिनसम्म सडकमा अलपत्र रहेका बालकदेखि वृद्धहरुसम्मलाई खानपानको व्यवस्थापन गरेर पनौती क्षेत्रलाई अस्तव्यस्त हुनबाट जोगाएको छ । यसरी युवाहरुको सक्रियतामा भएको यो कार्यलाई पनौती क्षेत्रभित्रका व्यवसायीहरुले सक्दो सहयोग गरेको युवाहरु बताउँछन् ।