सफा पानी अन्त जाने, फोहोर पानी हामीले खाने पानी नै छैन, कुन पानीले हात धुने ?

पनौती/खानेपानी संस्थानको चरम लापरवाही विरुद्ध पनौती बजारका उपभोक्ताहरु बाध्य भई नगरपालिका घेराउ गर्न पुगेका थिए । गत आइतबार “सफा खानेपानी अन्त जाने, फोहोर पानी हामीले खाने” भन्दै पनौती नगरपालिका घेर्न आइपुगेका पनौती नगरपालिका वडा नं. ७ पनौती बजारका महिलाहरुले नगरपालिका सामु ज्ञापन पत्र बुझाएका छन् । हलि नेवाः गुथी पँलाती, मिसा कचाको नेतृत्व र विभिन्न १४ वटा संस्थाको संयुक्त आयोजनामा नेतृ समिता श्रेष्ठ स्याउलाका अनुसार खानेपानी संस्थानको चरम लापरवाहीका विरुद्ध बाध्य भएर यो अवस्थामा आउनुपरेको बताउनुभएको थियो ।

ज्ञापन पत्र बुझ्ने क्रममा वरिष्ठ प्रमुख प्रशासकीय अधिकृत इन्द्रप्रसाद अधिकारीले खानेपानी संस्थानले भोलि बिहानसम्म स्वच्छ पानी व्यवस्थापन नगरेमा नगरपालिकाले ट्यांकरमार्फत् स्वच्छ पानीको व्यवस्थापन गरेर तपाईंहरुको समस्या तत्काललाई सम्बोधन गर्ने वचनबद्धता गरेपछि मात्रै बजारका उपभोक्ताहरुले आफ्नो आक्रोशलाई शान्त पारेका थिए ।

सोही कार्यक्रम अन्तर्गत आफ्ना समस्याहरुलाई लिपिबद्ध गर्दै ज्ञापन पत्रमार्फत् नगरपालिकाको ध्यानाकर्षण गर्ने क्रममा जनस्वास्थ्यमाथि सरोकारवाला निकायहरुले खेलवाड गरेको हुँदा तत्काल उक्त कमजोरीलाई नऔंल्याउन अनुरोध गर्दै स्वच्छ खानेपानीको व्यवस्थापन गर्न आग्रह गरेको व्यहोरा ज्ञापन पत्रमा उल्लेख गरेको छ । यदि ज्ञापन पत्रलाई कमजोरीका रुपमा लिएमा त्यसबाट निस्कन सक्ने गम्भीर परिणामको जिम्मेवार स्वयं नगर नेतृत्वले लिनुपर्ने भन्दै समस्यालाई राजनीतिको हारजितको सवाल नबनाउन समेत उपभोक्ताहरुले ज्ञापन पत्रमा उल्लेख गरेका छन् । ज्ञापन पत्रलाई ग्रहण गर्दै वरिष्ठ प्रमुख प्रशासकीय अधिकृत अधिकारीले ज्ञापन पत्रलाई सुझावको रुपमा लिएको स्मरण गराउनुभएको थियो ।

स्मरण रहोस्, यो समाचार तयार हुँदा समेत बजारवासीले खानेपानी संस्थानको तर्फबाट वितरण हुने स्वच्छ पानी पाएका छैनन् । नगरपालिका आइपुगेका उपभोक्ताहरुको आक्रोश थियो, हामीलाई कोरोना भाइरसले होइन, दुषित पानीले चाहिँ मार्ने भो । हामीले २÷३ महिना पहिलादेखि समस्याको बारेमा खानेपानी संस्थानलाई झक्झक्याएका थियौं तर हाम्रो स्वास्थ्यमाथि खेलवाड गरियो । हामीसँग पानी नै छैन भने कुन पानीले हात धुने ? भन्दै प्रश्न गरिरहेका थिए ।

यता वडा नं. ७ का वडा सदस्य पुरुषोत्तम कर्माचार्यका अनुसार सो सम्बन्धमा सम्बन्धित निकाय र नगरपालिकालाई पटकपटक अवगत गराउँदा पनि चासो नदिएकै कारण यो समस्या सिर्जना भएको बताउनुभएको छ । खानेपानीसँग सम्बन्धित प्राविधिकहरुको सल्लाहअनुसार अहिले पाइप लाइन जोडेको स्थानभन्दा २ किलोमिटर माथि लगेर पाइप लाइन राख्ने हो भने कुनै समस्या नै नआउने प्रतिवेदन प्राविधिकहरुले दिइसकेका छन् तर नगर नेतृत्वले उक्त प्रतिवेदनको बारेमा गम्भीर चासो नलिएकै कारण यो अवस्था सिर्जना भएको हो । तत्काल वडा नं. १२ सँग समन्वय गरेर समस्या समाधान गर्नुको साटो उल्टै वडा नं. १२ को नेतृत्व नै समस्या सिर्जना गर्ने अवस्थामा पु¥याउने काम उचित नभएको कर्माचार्यको गुनासो थियो ।