सञ्चारकर्मीलाई महासंघको अभिमुखिकरण

आर. एल.‌‌ श्रेष्ठ

काठमाडौं/कोभिड–१९ का वैज्ञानिक पक्ष र रिपोर्टिङका लागि सञ्चारकर्मीलाई अभिमुखीकरण कार्यक्रम नेपाल पत्रकार महासंघले विश्व स्वास्थ्य संगठनको सहकार्यमा र स्वास्थ्य तथा जनसंख्या मन्त्रालयको प्रतिनिधित्वमा काठमाडौं उपत्यकामा कार्यरत २ सय जना पत्रकारहरुका लागि कारोना महामारी सम्बन्धी भर्चुअल माध्यमबाट सम्पन्न गरेको छ ।
कोभिड १९ का स्वास्थ्यसँग सम्बन्धित पक्षहरु, वैज्ञानिक पक्ष र यसको रिपोर्टिङका लागि अपनाउनुपर्ने आवश्यक सचेतनाका बारेमा अभिमुखिकरण कार्यक्रम गरेको महासंघ केन्द्रले बताएको छ ।
कार्यक्रममा विश्व स्वास्थ्य संगठनका अधिकृत डा. दिपेन्द्र गौतम, डा. मैइका भट्टचन, रोशन नेपालले कोरोना भाइरस संक्रमण हुनसक्ने अवस्था तथा सामाजिक सञ्जालमा आउने भ्रामक हल्ला तथा सञ्चारमाध्यमले प्रकाशन तथा प्रशारण गरिरहेको सूचनाको अवस्थाका बारेमा प्रस्तुती राख्नुभएको थियो ।

अभिमुखिकरणमा विश्व स्वास्थ्य संगठन तथा स्वास्थ्य तथा जनसंख्या मन्त्रालयका विज्ञहरुले कोरोना भाइरस (कोभिड १९ संक्रमण) रोकथाम तथा समाचार सम्प्रेषण गर्दा अपनाउनु पर्ने सावधानीका बारेमा प्रकाश पारिएको थियो ।
कार्यक्रममा स्वास्थ्य मन्त्रालयका डा. समिर कुमार अधिकारी, विश्व स्वास्थ्य संगठन नेपाल शाखाका अधिकृत डा. राजन रायमाझी, डा. विनोद गुप्ता, राहुल प्रधान, डा. केदार मरहठ्ठा, डा. निराजन भुषाल लगायतका वक्ताहरुले सहभागीहरुबाट आएका कोभिड–१९ संग सम्बन्धित जिज्ञासाहरुको समाधान दिनुभएको थियो ।
कार्यक्रममा नेपाल पत्रकार महासंघका केन्द्रीय महासचिव रमेश विष्टले अभिमुखिकरण कार्यक्रमको औचित्यमाथि प्रकाश पार्दै कोरोना महामारिले सृजना गरेको संकटको घडिमा पत्रकारहरुलाई सुरक्षित भएर कार्यक्षेत्रमा काम गर्न आग्रह गर्नुभएको थियो । उहाँले प्रेस स्वतन्त्रता र पत्रकारको पेशागत सुरक्षाका लागि महासंघ प्रतिवद्ध रहेको भन्दै सामुहिक रुपमा आएका चुनौतिलाई सामना गर्दै अघि बढ्नुपर्ने धारणा पनि राख्नुभएको थियो ।
कार्यक्रमका सहजकर्ता एव्म महासंघका केन्द्रीय सचिव प्रकाश थापाले महासंघले जारी गरेको कोरोना निर्देशिका सबै सञ्चारकर्मी र सञ्चारमाध्यमले पालना गर्नुपर्नेमा जोड दिनुभएको थियो । साथै, यस्ता किसिमका अभिमुखिकरण कार्यक्रम पहिलो चरणमा उपत्यका, प्रतिष्ठान र एसोसियट प्रदेशमा गरिएको हो भने अब छिट्टै महासंघका अन्य प्रदेशहरुमा पनि गरिने जसबाट झण्डै ८ सय पत्रकार लाभान्वित हुने बताउनुभएको थियो ।

महिला पत्रकारको सुरक्षा र भूमिका विषयक अन्तरकृया

नेपाल पत्रकार महासंघ केन्द्रीय महिला समितिको आयोजनामा “कोरोना महामारीमा महिला पत्रकारको सुरक्षा र भूमिका” विषयमा भर्र्चुअल अन्तरक्रिया कार्यक्रम शनिबार सम्पन्न भएको छ ।
उक्त अन्तक्र्रियामा नेपाल पत्रकार महासंघका अध्यक्ष गोविन्द आचार्यले जस्तोसुकै परिस्थितिमा पेशाबाट विचलित नहुन आग्रह गर्नुभएको थियो । उहाँले पत्रकारको समस्यालाई संस्थागत रुपमा हल गर्ने भन्दै जोखिममा रहेका समुदायको आवाजलाई उजागर गर्नु पहिलो आवश्यकता रहेको बताउनुभएको थियो ।
नेपाल पत्रकार महासंघका केन्द्रीय सचिव तथा महिला समिति संयोजक लक्ष्मी पुनले कोरोना महामारीको हालको अवस्थामा महिला पत्रकारको अवस्था र पेशागत सुरक्षाका बारेमा कार्यक्रमको आयोजना गरिएको बताउनुभएको थियो । उहाँले नेपाल पत्रकार महासंघ प्रदेश, जिल्ला, प्रतिष्ठान तथा एसोसियट शाखा उपाध्यक्षहरुलाई समेटेर कोरोनाको समयमा महिला पत्रकारको मानसिक तथा शारिरिक स्वास्थ्य महत्वपूर्ण भएको बताउँदै यो विषयमा चर्चा गरिएको उल्लेख गर्नुभएको थियो ।
महासंघका अर्का केन्द्रीय सचिव प्रकाश थापाले कोरोना महामारीलाई जितेर अगाडी बढ्न सबै महिला पत्रकार आम नागरिक भन्दा बढी जिम्मेवार हुनुपर्ने बताउनुभएको थियो । कार्यक्रममा शुक्रराज ट्रपिकल तथा सरुवा रोग अस्पतालमा कार्यरत सरुवा रोग विषेशज्ञ डा. शेरबहादुर पुनले कोरोना संक्रमणबाट बेच्ने उपाएका बारेमा आफ्ना धारणा राख्नुभएको थियो ।
यस्तै, मानसिक स्वास्थ्य परामर्श विद् डा. करुणा कुवँरले कोरोना कालमा मानसिक स्वास्थ्यका लागि सचेत रहन आग्रह गर्नुभएको थियो । उक्त कार्यक्रममा सिभिल बैंकका कार्यकारी प्रमुख गोविन्द गुरुङले बैकल्पिक आयआर्जनका बारेमा बैंकहरुले ल्याएको नयाँ योजना बारेमा पनि जानकारी दिनुभएको थियो । कार्यक्रममा प्रदेश समिति तथा जिल्ला शाखाका उपाध्यक्षहरुले आफ्नो प्रदेश तथा जिल्लामा कोरोना माहामारीका कारण उत्पन्न समस्याका बारेमा रिपोटिङ गरेका थिए ।