दक्ष जनशक्तियुक्त गाउँपालिका हाम्रो चाहना ः अध्यक्ष लामा

सिर्जना तामाङ

कटुन्जेबेशी । दक्ष जनशक्ति उत्पादन गरी सक्षम गाउँपालिकाको रुपमा रोशी गाउँपालिकालाई स्थापित गर्ने जमर्काे सहित एक गाउँ एक अधिकृत, एक गाउँ एक इन्जिनियर अभियानलाई मूर्त रुप दिने जमर्काे सहित छनौट भएका प्रतियोगीहरुलाई आइतबार गाउँपालिका अध्यक्ष डिबी लामाले प्रोत्साहन रकम एक समारोहबीच हस्तान्तरण गर्नुभएको छ ।

आफ्नै गाउँपालिकामा दक्ष जनशक्ति उत्पादन गर्ने जमर्काे सहित क्षमता भएका तर आर्थिक अवस्था कमजोर रहेका जेहेन्दार विद्यार्थीहरुका लागि गाउँपालिका आशाको धरोहर बन्ने जमर्काेमा पुगेको छ । रोशी गाउँपालिका समग्र जिल्लाहरुको भू–बनावटलाई हेर्ने हो भने अत्यन्तै पिछडिएको गाउँपालिकाको रुपमा गनिन्छ । त्यसैले गाउँपालिकाले आफ्नो नीतिमा एक गाउँ एक अधिकृत र एक गाउँ एक इन्जिनियर उत्पादन गर्ने अभियान अन्तर्गत यो आर्थिक वर्षको प्रोत्साहन रकम वितरण गरेको बताउनुभएको छ ।

अध्यक्ष लामाका अनुसार एक गाउँ एक अधिकृत उत्पादन अन्तर्गत यो आ.व.मा वडा नं. १२ का विजय मोक्तान र इन्जिनियरतर्फ वडा नं. ११ का सन्तोष मैनालीलाई अध्ययन गर्नका लागि सहयोग स्वरुप ५०÷५० हजार रुपैयाँ प्रोत्साहन रकम प्रदान गरिएको थियो बताउनुभएको छ । गाउँपालिकाले सार्वजनिक सेवामा विपन्न तथा जेहेन्दार नागरिकको पहुँच पुगोस् भन्नाको खातिर सो योजना अगाडि सारेको बताउनुभएको छ । गाउँपालिकाले उक्त प्रयोजनका लागि छनौटका निश्चित मापदण्ड बनाएको छ । सो मापदण्डभित्र समेटिनेहरुले सो प्रोत्साहन रकम प्राप्त गरी दक्ष शिक्षा हासिल सक्नेछन् । उक्त शिक्षा प्राप्त पश्चात् गाउँपालिकामै रोजगारको व्यवस्था समेत गर्ने जमर्काे लिएको अध्यक्ष लामाको जिकिर थियो । विशेष गरी छनौटमा महत्वपूर्ण भूमिका रहने शिक्षा इकाईले आफ्नो जिम्मेवारीलाई नीतिसंगत ढंगबाट पूरा गरेको इकाई प्रमुख रामबहादुर तामाङले बताउनुभएको छ ।

तामाङका अनुसार अधिकृतका लागि फारम भरेको प्रवेशपत्रको प्रतिलिपि, शाखा अधिकृतको प्रारम्भिक परीक्षा उतिर्ण गरेको नतिजाको प्रतिलिपि, शैक्षिक योग्यताको प्रमाणपत्रको प्रतिलिपि (सामुदायिक विद्यालयबाट एस.एल.सी.वा सो सरह) अध्ययन गरेको हुनुपर्ने, नागरिकताको प्रतिलिपि, सम्बन्धित वडाबाट विपन्न भनी सिफारिस गरिएको व्यक्तित्वहरुबीचबाट छनौट प्रक्रिया अगाडि बढ्ने नीतिगत व्यवस्था अनुरुप हुँदै आएको बताउनुभएको छ । त्यस्तै एक गाउँ एक इन्जिनियरतर्फ इन्जिनियरिङ विषयमा प्रविणता–पत्र उतिर्ण गरेको, सामुदायिक क्याम्पसबाट स्नातक इन्जिनियरिङ भर्ना भएको प्रमाण पत्रको प्रतिलिपि लगायतका कागजातको आधारमा छनौट प्रक्रियामा गई विधिगत रुपमा प्रक्रिया पूरा गरेर छनौट भएको व्यक्तिहरुलाई सो रकम प्रोत्साहन स्वरुप प्रदान गरिने व्यवस्था छ ।