भूगोलकै प्रतिनिधित्व गर्दैछ रोशी ः अध्यक्ष डिबी

सिर्जना तामाङ

कटुञ्जे । अस्थायी संरचनाको शुभारम्भ गरेको एक हप्ता नपुग्दै स्थायी संरचनाको शिलान्यास गर्न खहरेपाँगु आइपुगेका रोशी गाउँपालिकाका अध्यक्ष दिलबहादुर मोक्तान (डिबी लामा) ले उक्त भनाइ राख्नुभएको हो ।
एक हप्ता अगाडि कोभिड अस्पतालको शुभारम्भ गरिएको उक्त स्थानमा सोमबार स्थायी रोशी अस्पतालको नामाकरण दिएर शिलान्यास गर्न पाउँदा स्थानीय मात्र नभएर आफूमा समेत उर्जा चलायमान हुन पुगेको अध्यक्ष लामाको जिकिर थियो । रोशी अस्पताल भवन बन्ने भनेको यो क्षेत्रका जनताले समयमा सिटामोल पाउनु हो । यो रोशीको मात्र आवश्यकता थिएन, सिंगो भूगोलको आवश्यकता थियो । ठूलो संघर्ष पश्चात् यसले आज मूर्त रुप लिन आइपुगेको छ । यसलाई पूरा गर्ने दायित्व गाउँपालिका सँगसँगै यो भूगोलवासीको समेत रहेको अध्यक्ष लामाको तर्क थियो । हामीले यो अस्पताल यहाँ स्थापना गर्ने सवालमा निकै उतारचढाव झेल्यौं । राजनीतिक दल त्यो बेला मात्र सक्रिय हुन्छ, जतिबेला चुनाव हुन्छ । विकास निर्माणमा हामी जनप्रतिनिधि जनताका साझा सम्पत्ति हौं । यहाँ कुनै दल विशेषको अर्थ रहन्न, रहन्छ त समृद्ध रोशी निर्माणमा समर्पित हुने चाहना रहन्छ । त्यसैले नीतिसंगत ढंगबाट हेर्ने हो भने यो रोशी गाउँपालिकाको लागि व्यवहारिक नहुन सक्ला तर भूगोलको हिसाबले अत्यन्तै उपयुक्त स्थान रहेको स्मरण गराउनुभएको थियो ।
कार्यक्रममा रोशी अस्पताल व्यवस्थापन समितिका अध्यक्ष गणेश लामाको तर्क थियो– नागरिकहरुको स्वास्थ्यको अवस्था कस्तो भन्ने बारेमा अवगत गराइराख्नु पर्छ जस्तो लाग्दैन । यहाँ कति आमा, दिदीबहिनीहरुले सुत्केरी हुन नसकेर अकालमै ज्यान गुमाउनुपरेको उदाहरण हाम्रा अगाडि छर्लङ्ग छ । त्यसैले पनि यो अस्पताल निर्माण गर्ने दायित्व यस भूगोलका प्रत्येक नागरिकसँग जोडिन्छ । यस अस्पताल निर्माण पश्चात् रोशी गाउँपालिका लगायत बेथानचोक, महाभारत, खानीखोला गाउँपालिकाका हजारौं नागरिकहरुले लाभान्वित हुने अवसर प्राप्त गर्नेछन् । हाललाई गाउँपालिकाको स्वामित्वमा रहेको २५ रोपनी जग्गामा यस अस्पतालको स्वामित्व कायम गरी निर्माण अगाडि लगिनेछ ।
कार्यक्रममा उपप्रमुख लक्ष्मीकुमारी बर्ताैला, प्रमुख प्रशासकीय अधिकृत डमरु दाहाल लगायत वडा प्रतिनिधिहरुले अस्पतालको बारेमा चर्चा, परिचर्चा गर्नुभएको थियो । १० शैयाको अस्पतालको निर्माण लागत करिब एक करोड ८३ लाखमा गाउँपालिकाले जनाएको छ । विशेष गरी यो अस्पतालमा स्त्री रोग, सामान्य शल्यक्रिया लगायतको सुविधा स्थानीयले पाउनेछन् । कार्यक्रमको अध्यक्षता वडा अध्यक्ष श्रीदास लामाले गर्नुभएको थियो भने कार्यक्रमको सञ्चालन गणेशबहादुर लामाले गर्नुभएको थियो ।