नगरपालिकामा एम्बुलेन्स र आइसोलेसन अभावकै कारण कोहि कसैले समस्या भोग्नु पर्दैन, कसैको मृत्यु पनि हुँदैन ः प्रमुख न्यौपाने

काभ्रे । आइतबार आइसोलेसन कक्षको अनुगमन गर्ने क्रममा पनौती नगरपालिकाका नगर प्रमुख भीम न्यौपानेले नगरवासीले एम्बुलेन्स र आइसोलेसन अभावकै कारण कोहि कसैले समस्या भोग्नु पर्दैन, कसैको मृत्यु पनि हुँदैन भन्नुभएको छ ।

नगरस्तरीय आइसोलेसन कक्षको अनुगमन गर्ने क्रममा वार्डहरुको अवस्थाबारे जानकारी लिनुहुँदै कुनै पनि अवस्थामा कोभिड पिडितहरुले चाहेको सुविधा दिन आवश्यक पर्ने कुनै पनि सामान, प्रविधि र प्राविधिकको अभाव नहुने किसिमले आइसोलेसन वार्डलाई चुस्त, दुरुस्त रुपमा राख्न सम्बन्धित पक्षलाई निर्देशन दिनुहुँदै उच्च व्यवस्थापकीय ढाँचामा सञ्चालन गर्नका लागि नगरपालिका कटिबद्ध रहेको पनि नगर प्रमुख न्यौपानेले सो अवसरमा खुलासा गर्नुभएको छ ।

कुनै पनि नगरवासीमा कोभिड सम्बन्धी समस्या आए निसंकोच जानकारी गराइ सुविधा लिन आग्रह गर्नुहुँदै रोग लुकाएर नबस्न नगरवासीलाई नगर प्रमुख न्यौपानेले आग्रह समेत गर्नुभएको छ । यदाकदा केही नगरवासीहरुले समस्या लुकाएको गुनासो आएको हुँदा त्यसतर्फ नगर सचेत भएको छ । यो समस्या सिर्जना हुनु कुनै व्यक्तिको दोष होइन । किन लुकाउनुप¥यो ? स्वास्थ्यको मापदण्ड पूरा हुँदाहुँदै पनि संक्रमित हुनु कुनै दोष वा अभिशाप होइन । त्यसैले सुरक्षित अवधारणाका साथ रहँदा पनि कोभिडको सिकार हुनपुगेको यथार्थ कोहिबाट लुकेको छैन । यो यथार्थतालाई आत्मसाथ गर्दै समस्या लुकाएर भयावह नबनाउन नगर प्रमुख न्यौपानेले नगरवासीलाई सचेत समेत गराउनुभएको छ ।

तत्कालका लागि आकस्मिक सम्बोधन गर्ने जमर्काे यो आइसोलेसन वार्डबाट गराउनेछौं । कालान्तरमा नगरमा रहेका स्वास्थ्य संस्थाहरुको स्तरोन्नती गरी दीर्घकालिन रुपमै स्वास्थ्य सेवामा नगरले पूर्णता हासिल गर्ने विश्वास रहेको बताउनुभएको छ ।

उक्त आइसोलेसन वार्डका बारेमा स्वास्थ्य शाखा प्रमुख पुरुषोत्तम तिमल्सिनाको तर्क छ– यो आइसोलेसन कक्ष आकस्मिक सेवाको लागि व्यवस्थापन गरिएको हो । सुविधा सम्पन्न अस्पतालहरुमा संक्रमितहरुको व्यवस्थापन नभएसम्मका लागि यो आइसोलेसन वार्डमा संक्रमित आरामसँग सेवा लिएर रहन सक्नेछन् तर सुरुमै जटिल अवस्थामा पुगेकाहरुका लागि यहाँबाट सेवा दिन सकिने अवस्था रहन्न । केही न केही राहत भने पक्कै पुग्नेछ भन्ने विश्वास नगरले लिएको शाखा प्रमुख तिमल्सिनाले बताउनुभएको छ ।

अत्याधुनिक सुविधा सम्पन्न वार्डहरुमा संक्रमितहरुको अनुगमन कन्ट्रोल रुमबाटै गर्न सकिने व्यवस्था गरिएको छ । सिसि क्यामेरा सहितको व्यवस्था गरिएको सो आइसोलेसन वार्डमा एक डाक्टर, दुई स्वास्थ्यकर्मीको २४ सै घण्टा निगरानीमा रहेर बिरामीले सेवा पाउनेछन् । एम्बुलेन्स सहितको सो सेवाबाट बनेपा र धुलिखेल नपुगी सेवा नपाउने संक्रमितहरुका लागि यो आइसोलेसन वार्डले राहत मिल्ने विश्वास वडा सचिव राजकुमार श्रेष्ठको छ ।