बजार अनुगमनलाई निरन्तरता देऊ, रासायनिक मलमा काला बजारिया बन्द गर

राज्यले अनुदानमा उपलब्ध गराउँदै आएको रासायनिक मल (युरिया, डिएपि) बजारमा अभाव भएको मौका छोप्दै काला वजारीयाहरु मौलाएका छन् । खुलेआम ढंगबाट ४५ केजि भएको युरिया मल १ बोराको लागि २ हजार ८ सय सम्ममा बिक्री हुदै गर्दा सम्बन्धित निकायको ध्यान पुग्न नसक्दा कृषकहरू ठगिएका छन् । कृषिको लागि प्रचुर सम्भावना रहेको काभे्र जिल्लामा रासायनिक मलको अभावले गर्दा कृषकहरू काला वजारीयासंग मल किन्न बाध्य भएका छन् । बजारमा ४५ किलोको बोरामा मल पर्याप्त छ । छिमेकी मुलुक भारतमा बिक्रीको लागि राखिएको उक्त मल वीरगन्ज नाकामा १ हजार ५० मा उपलब्ध हुन्छ तर सोही मल वजारमा २ हजार ८ सय सम्ममा बिक्री हुँदा सम्बन्धित निकाय मौन रहेको छ । बजार अनुगमनलाई निरन्तरता दिदै ठगिएका कृषकहरुको चह¥याई रहेको घाउमा महलम पट्टि लगाउन जरुरी रहन्छ ।
वि.पि राजमार्ग र थानकोट हुँदै भित्रने उक्त मल काभ्रे जिल्लामा ठुलो परिणाममा भित्रिएको छ । राजमार्गको बिभिन्न स्थानहरूमा सवारी साधनहरु चेक जाँच गरिन्छ तर उक्त मल ढुवानी गर्ने सवारी साधन निर्विवाद ढंगबाट भित्रन्छ । बजारमा खुलेआम ढंगबाट बिक्रि हुन्छ समस्यामा परेका कृषकले बाध्य भएर खरिद गर्नुको विकल्प छैन । यसरी खुलेआम रुपमा कालोबजारी मच्चि रहँदा पनि जनताको दुखमा साथ दिने साथै कानुन विपरित कार्य गर्नेलाई दण्डित गर्ने भन्दै जिम्मेवारी सम्हाल्दै गरेकाहरू मौन रहनुलाई कृषकहरूले मसिनो ढंगबाट नियाल्दै छन् । काला बजारियालाई साथ सहयोग साथै हौसला मिल्ने ढंगबाट कार्य गर्दै गर्दा निर्धक्कका साथमा वजारमा युरिया मल २८ सयमा बिक्री भएको कृषकहरूको गुनासो रहेको छ ।
काभ्रे जिल्लामा रहेका कृषि सामाग्री कम्पनी लिमिटेडको कार्यालय र साल्ट ट्रेडिङ लिमिटेडको कार्यालयबाट उपलब्ध गराउनु पर्ने मल समयमा उपलब्ध नगराउनु साथै प्रहरी प्रसाशनले कुनै चासो नदिनुले काला बजारीयाको लागि हौसला मिलेको छ । काला बजारियाका व्यवसाय मौलाएको १ बर्ष भइसक्दा पनि कसैको चासो नपुग्दा उनिहरुको लागि राम्रो कमाईको अवसर जुटेको छ । गत बर्षमा पनि आलुको सिजनमा आवश्यक पर्ने डिएपि मल अभाव भयो । सो समयमा नाका क्षेत्रमा रहेका बिभिन्न ब्रान्डका मलहरु खरिद गरी मलको बोरा परिवर्तन गरेर बेच्ने कार्य समेत नभएको होइन ।
काभ्रे रहेका उर्वरभूमिमा मलको अभावले गर्दा मकै वाली सखाप भयो । धान खेती समेत सखाप हुँदैछ, पनौती र नाला लगायतका स्थानहरूमा अगौटे आलु खेती गर्ने समय भएको छ । कृषकको घरघरमा आलुको विउ तयार भएको छ तर मलको अभाव वाट मकै वाली धान वाली सखाप भएर चिन्तामा छटपटाई रहेका कृषकहरू आलुखेतीबाट केही राहत हुनेमा आशावादी थिए तर मलको अभाव निरन्तर हुदै गर्दा आशा निरासामा परिणत भएका छन् । मल अभावको मौका छोप्दै गुणस्तर हीन मल कालो बजारी गरी कृषकहरूलाई मर्काउने कार्यलाई रोक्नको लागि बजार अनुगमन गरी काला बजारियाहरूलाई कारवाहीको दायरामा ल्याउन जरुरी रहन्छ ।