“अ बाट अरब”

महेन्द्र थुलुङ राई

सरकारलाई,
अर्को सरकार बनाउन थियो ।
दुइ महिनामा,
चार करोड मतपत्र छाप्न भ्यायो ।
गाउ–गाउ पठायो
र,उर्दि जारि गर्यो ।
हामिलाइ भोट नहाल्नेहरुको बुडि औला काटिनेछ ।

सरकारलाइ,
देशको भबिस्य बनाउन थिएन
एक बर्षमा पचास लाख किताव छाप्न सकेन ।
र,पठाउन सकेन गाउको बिध्यालयमा ।

एउटा बालक
मतदान केन्द्र रहेको
आफ्नै बिध्यालयको फोहोरको थुप्रोमा
थोत्रे मतपत्र खोजेर पढि रहेछ ।
क बाट कम्युनिस्ट
का बाट काङ्रेस ।
ठिक यहि बेला
उसको आमाले सिकाइन
अ बाट अरब ।
मैले उसको आमालाइ भने
आ बाट आन्दोलन ।

आमा,
कृस्णभिर जस्तो च्यातिएको मजेत्रोले
त्रिसुलि पसिना पुछेर
बेगनास ताले शान्त आखाले
खुडा जस्तै माछापुच्छ्रे उठाएर
सेति नदि भासिएको स्वरमा बोलिन
नाइल नदि जस्तै लामो मेरो सिन्दुरको धर्का
आ ले आगो बालेर सल्कायो ।
खुवालुङ्गा जस्तो अटल मेरो मुटु
आ ले आराले काट्यो ।
देश जस्तै मेरो पैतला
आ ले आरनमा पोल्यो ।
अब कुन आ ले आकार लिन्छ र आफ्नो होला बाबु?

यहि बेला,
एक हुल मान्छे जिन्दाबाद र मुर्दाबादको नारा लगाउदै आयो ।
ब्रेकिंग समाचार रेडियोले भन्यो ।
शहिदको सपना पुरा गर्न
सरकारले अर्को चुनावको घोसणा गर्यो ।

अ बाट अरब….
अ बाट अरब….
भन्दै आमा छोरा शहिद गाउको गोरेटो
निगालोको झ्याङ्ग समाउदै ओरालो लागे ।