अपरिपक्व निर्णय घातक हुन्छ

नेपालको राजनीतिमा पछिल्ला घटनाक्रमहरु चुनौतीपूर्ण भएर आएका छन् । १७ महिनाको दौरानमा राजनीतिक नेतृत्वले ४÷४ पटक आफ्नो स्पष्टीकरण जनताका सामु दिनुपरेको छ । यसले समग्र राजनीतिक क्षेत्रमा मौलाएको विकृतिलाई पृष्ठपोषण गर्दछ ।
यस किसिमका गतिविधिहरु आफैंमा पाच्य पक्कै होइनन् । जनसरोकारका विषयमा सूक्ष्म ढंगले अध्ययन मनन् र कार्यान्वयन गर्नुपर्ने जनप्रतिनिधिहरु सत्ताको वरिपरि रुमलिरहँदा कर्मचारीतन्त्र स्वभाविक रुपमा हाबी हुनु नौलो होइन । किनकी यहाँ राजनीयिक कर्मनीयता राम्रैसँग देख्ने अवसर मिलेको छ । त्यसैको जगमा टेकेर कर्मचारीतन्त्रले राजनीतिकप्रति हिलो छ्याप्ने बाटो खोलिदिएको छ । यस किसिमका गतिविधि नेपाली जनताले पक्कै पनि चाहेका थिएनन् । तर दुःखका साथ भन्नुपर्छ आज त्यसैको सिकार नेपाली जनता भएका छन् ।
सरकार सदाचार र जवाफदेहितामा चुकेको प्रत्यक्ष अनुभूति गृहमन्त्री रवि लामिछानेले आफ्नो ४५ मिनेट लामो सम्बोधनमा व्यक्त गरेका अभिव्यक्तिहरुले पुष्टि गरेको छ । राजनीति वृत्तमा यसलाई राजनीतिक अशिष्टताको संज्ञा दिँदै सत्ता बाहिर र सत्ता भित्र हुँदाको रंगहरुका बारेमा चर्चा मात्र गरेका छैनन्, मेरा कुरा गर्छस् भने तेरा पनि बाँकी राख्दिन्नँ भन्ने अशिष्ट अभिव्यक्तिले समग्र राजनीतिक नेतृत्वमाथि नै प्रश्न चिह्न उठाउँदै भ्रष्टाचार निर्मुल होइन कि अव्यवहारिक अनैतिक गतिविधिलाई ढाकछोप गर्न प्रेरित गर्ने सन्देश आउनु आफैंमा कलंकित र अपरिपक्व निर्णय घातक सावित हुने संकेत गर्दछ ।
जनताको ठूलो बलिदानबाट प्राप्त संवैधानिक राजतन्त्रको अन्त्य गर्दै स्थापित गणतन्त्रमाथि नै प्रश्न मात्र उठेका छैनन्, कार्यान्वयनका पक्षमा समेत गम्भीर शंकाहरु मडारिएका छन् । सत्ताको समिकरण मिल्दा तैँ चुप, मै चुप, सत्ताको समिकरण नमिल्दा पाखुरा सुर्कासुर्की । यो राजनीतिक संस्कार हुनै सक्दैन । नेपाली जनताले घटनाक्रमको अपेक्षा गरेका छैनन् र हुनु पनि हुँदैन भन्ने निचोडमा हामी पुगेका छौं ।
यदि यस किसिमको कमजोरी पटक–पटक दोहो¥याइन्छ भने त्यसका विरुद्ध जनमत सिर्जना हुनु सामान्य अर्थका रुपमा लिनुको विकल्प छैन । त्यसैले राजनीतिक नेतृत्वले कुनै पनि अभिव्यक्ति दिँदा सुझबुझका साथ जनतामा नकारात्मक सन्देश प्रवाह नहुने किसिमबाट जान हाम्रो आग्रह छ । अन्यथा निस्कने जुनसुकै परिणामको भागिदार राजनीतिक नेतृत्व हुनुपर्ने ठम्याईमा हामी पुगेका छौं ।