(एसईई) २०८१ को नतिजा अहिले केही बेरमा सार्वजनिक गर्ने तयारी

काभ्रे / राष्ट्रिय परीक्षा बोर्ड ले माध्यमिक शिक्षा परीक्षा (एसईई) २०८१ को नतिजा अहिले केही बेरमा सार्वजनिक गर्ने तयारी पूरा गरेको छ । बोर्डका परीक्षा नियन्त्रक टुकराज अधिकारी का अनुसार अहिले साँझ ८ बजे पत्रकार सम्मेलनमार्फत नतिजा औपचारिक रूपमा सार्वजनिक गरिने बताएउनुभएको छ भने विद्यार्थीले राति ९ बजेदेखि विभिन्न माध्यमबाट आफ्नो नतिजा हेर्न सक्नेछन् ।

परीक्षा नियन्त्रक अधिकारीले नतिजा प्रकाशनको सम्पूर्ण तयारी पूरा भइसकेको जानकारी दिँदै पत्रकार सम्मेलनपछि वेबसाइट, एसएमएस तथा आईभीआर प्रणालीमार्फत नतिजा उपलब्ध गराइने बताएको छ । “साँझ ८ बजे पत्रकार सम्मेलन हुन्छ, त्यसपछि करिब ९ बजेदेखि विद्यार्थीले नतिजा हेर्न सक्ने व्यवस्था मिलाइएको छ,” उनहाँले भन्नुभयो ।

यसअघि बोर्डको बैठकले नतिजा सार्वजनिक गर्ने औपचारिक निर्णय गरिसकेको थियो । यस वर्षको एसईई परीक्षा गत चैत १९ गतेदेखि २९ गतेसम्म देशभर सञ्चालन गरिएको थियो । परीक्षा अवधिभर अधिकांश केन्द्रहरू शान्तिपूर्ण रूपमा सञ्चालन भएका थिए भने कतिपय जिल्लामा मौसम तथा व्यवस्थापनका चुनौतीबीच पनि परीक्षा सफलतापूर्वक सम्पन्न गरिएको बोर्डले जनाएको छ ।

यसपटक उत्तरपुस्तिका परीक्षण प्रणालीमा गरिएको सुधारका कारण नतिजा प्रकाशन प्रक्रिया तुलनात्मक रूपमा छिटो सम्पन्न भएको जनाइएको छ । बोर्डले पहिलो पटक धेरै परीक्षा केन्द्रमै उत्तरपुस्तिका परीक्षणको व्यवस्था मिलाएको थियो । यसले उत्तरपुस्तिका ढुवानी, संकलन र परीक्षणमा लाग्ने समय घटाएको तथा नतिजा प्रकाशनलाई सहज बनाएको बोर्डको भनाइ छ ।

यस वर्ष एसईई परीक्षामा कुल ५ लाख १२ हजार ४२१ जना विद्यार्थीले आवेदन फारम भरेका थिए । नियमिततर्फ ४ लाख ४१ हजार ५६६ जना तथा ग्रेडवृद्धितर्फ ७० हजार ८५५ जना विद्यार्थी सहभागी भएका थिए । सहभागीमध्ये २ लाख ५७ हजार ६१३ छात्रा, २ लाख ५४ हजार ८०१ छात्र तथा अन्य ७ जना रहेको बोर्डले जनाएको छ ।

नतिजा सार्वजनिक भएसँगै देशभरका विद्यार्थी, अभिभावक तथा विद्यालयहरूमा उत्सुकता बढेको छ । एसईईलाई विद्यालय तहको महत्वपूर्ण राष्ट्रिय परीक्षा मानिने भएकाले यसको नतिजाले विद्यार्थीको आगामी शैक्षिक यात्रा निर्धारण गर्ने आधार तयार पार्ने गर्दछ । नतिजापछि विद्यार्थीले कक्षा ११ मा विषय छनोट तथा भविष्यको अध्ययन क्षेत्र तय गर्ने प्रक्रिया अघि बढाउनेछन् ।

बोर्डले विद्यार्थीलाई अनावश्यक भीड नगर्न तथा आधिकारिक माध्यमबाट मात्र नतिजा हेर्न आग्रह गरेको छ । नतिजा हेर्नका लागि वेबसाइटमा एकैपटक धेरै प्रयोगकर्ता प्रवेश गर्दा समस्या आउन सक्ने भएकाले एसएमएस र आईभीआर सेवा पनि प्रयोग गर्न सकिने जनाएको छ ।

एसएमएस र आईभीआरबाट नतिजा हेर्ने तरिका
नेपाल टेलिकम : १६०० (SMS/USSD र IVR सेवा)
जानकी टेक्नोलोजी : ३५००१ (SMS सेवा)
एम्बिसन गुरु : ३१०६९ (SMS सेवा)
वेबसाइटमार्फत नतिजा हेर्ने माध्यम
SEE Official Website
National Examination Board,
SEE NTC Result Portal
eKantipur,
Edusanjal SEE Result
Khalti App