काठमाडौँलाई ‘खुला संग्रहालय’ बनाउने महानगरको योजना, अन्तर्राष्ट्रिय फिल्म फेस्टिभल पनि आयोजना हुने

काठमाडौँ, काठमाडौँ महानगरपालिकाले आगामी आर्थिक वर्ष २०८३/८४ को नीति तथा कार्यक्रममा ‘सांस्कृतिक सहर : समृद्ध महानगर’को अवधारणालाई प्राथमिकता दिँदै ऐतिहासिक तथा सांस्कृतिक सम्पदाको संरक्षण, प्रवर्द्धन र विकासमा जोड दिएको छ।

महानगरले काठमाडौँलाई खुला तथा जीवन्त संग्रहालय र रचनात्मक सहरका रूपमा विकास गर्ने लक्ष्य लिएको छ। यसअन्तर्गत ऐतिहासिक, धार्मिक, पुरातात्त्विक तथा सांस्कृतिक महत्त्वका मठ, मन्दिर, चैत्य, द्योस्छें, वहा–वहि, हिति, पोखरी, गुम्बा, स्तुपा, चोक, ननि, डबली र फल्चालगायत सम्पदास्थलहरूको अध्ययन, डिजिटल अभिलेखीकरण, नक्सांकन, मर्मत, जिर्णोद्धार तथा पुनर्निर्माण गरी संरक्षण र प्रवर्द्धन गरिने उल्लेख गरिएको छ।

नीति तथा कार्यक्रममा विदेशी पाहुनासमेत सहभागी हुने अन्तर्राष्ट्रियस्तरको ‘काठमाडौँ फिल्म फेस्टिभल’ आयोजना गर्ने योजना पनि समावेश गरिएको छ।

यसैगरी, मौलिक तथा परम्परागत सिप, कला र ज्ञानको संरक्षण, पुस्तान्तरण र पुनरुत्थानका लागि ऐतिहासिक, पुरातात्त्विक, सांस्कृतिक तथा वास्तुकलात्मक महत्त्वका निजी तथा संस्थागत भवनहरूको पुनर्निर्माण तथा सम्पदा बस्ती संरक्षणमा प्रोत्साहन गरिने महानगरले जनाएको छ।