बहिनीको पत्र !

रचना मोक्तान यात्री

प्रत्येक बर्षझैँ
फेरि आइपुग्यो घडीको रफ्तारमा
यौटा नयाँ क्यालेन्डर
क्यालेन्डरसँगै फेरियो जीवनको आवरण ।

थपियो जीवनको अंकगणित
अंकगणितसँगै घट्दै गयो यौवनको ऐकिक नियम
जीवन फुलेकै छ
यौवनहरू हुर्कँन बाँकी छँदै
यसरी हरेक बर्ष फेरिँदै गयो भने
सिरानीमाथि झुन्डिएको क्यालेन्डर
कसरी मुस्कुराउला हजुरजस्तै ?
दाइ !
समय हो जो दौडिरहन्छ
जीवनले केही असफलता पाउला
नआत्तिनु
हिँड्दा बाटोमा पहाड भेटिएला
नअडिनु
हजुरका औँलाहरू जो छन्(
सारेगमसँग नाचिरहोस् ।

हजुरका सिर्जनाहरू जो छन् ती सबै प्रिय छन्
तपाईं नदी हो निरन्तर बगिरहनुस्
यस्तै जीवन बाँचिरहनुस्
एकदिन भेटाउनु हुने छ भेटाउन बाँकी शालिकग्राम
शुभकामना यहि हो यहि रहनेछ ।