अन्ततः संयोजकमा छनौट भए श्रेष्ठ

बनेपा/नेपाल रेडक्रस सोसाइटी काभ्रे शाखा विधिवत् रुपमा तदर्थ समितिमा कायम भएको छ । प्रभातफेरी साप्ताहिकले रेडक्रसको विधानलाई पछ्याउँदै लेखेको समाचारको प्रभावकारिताले नै केन्द्रीय समितिले यो निर्णय गरेको स्रोतले उल्लेख गरेको छ ।

रेडक्रस जस्तो मानवीय संस्थामा भएका अनियमितताका बारेमा सार्वजनिक चासोको रुपमा आएपछि सरोकारवाला निकायले सम्बन्धित पक्षसँग स्पष्टीकरण लिएको थियो । जसको परिणाम अन्नतः जिल्ला समिति तदर्थ समितिमा परिमार्जित भएको छ । विधान अनुसार यो तदर्थ समितिले ६ महिनाभित्र सबै उपशाखा र जिल्ला शाखाको निर्वाचन गरिसक्नुपर्ने प्रावधान रहेको स्रोतले उल्लेख गरेको छ ।

लामो रस्साकस्सीपछि नेपाल रेडक्रस सोसाइटी केन्द्रीय समितिको बैठकले विधान अनुसार अधिकार प्रत्यायोजन गरी गठित समितिको २०७७ बैशाख १९ गतेको निर्णयअनुसार नेरेसोको प्रचलित विधानको दफा ३५ को उपदफा १ बमोजिम नेपाल रेडक्रस सोसाइटी काभ्रेपलाञ्चोक जिल्ला शाखालाई तदर्थ समितिमा कायम गरेको छ ।

जसमा लामो समय रेडक्रसको क्षेत्रमा जिम्मेवारी बहन गरेर राष्ट्रियस्तरमा स्थापित व्यक्तित्व पुर्वसभापति समुन्द्रलाल श्रेष्ठलाई सर्वसम्मत संयोजकमा चयन गरेको छ । अन्य पदाधिकारीहरुको भने संयोजक चयन गरेको ११ दिनपछि क्रमशः सचिव पुष्पा खड्का बस्नेत, कोषाध्यक्ष महेश्वर जंगम र सदस्यहरुमा शंखबुद्ध लामा, बिदुर घिमिरे, निर्मला श्रेष्ठ, राजु सिग्देल, शिवराम आचार्य, रामप्रसाद कोईराला, रघुनाथ हुमागाई, उद्धव पौडेल, बिष्णुमणी नेपाल, अनन्तकृष्ण श्रेष्ठ, मुकुन्द अर्याल, कमल घिमिरेलाई चयन गरेको नेरेसो केन्द्रीय समितिको मिति २०७७ वैशाख २६ को प.सं. २२२६÷०७६÷०७७ पत्रअनुसार उल्लेख गरेको छ ।

आफ्नो नाम उल्लेख नगर्ने सर्तमा संयोजक छनौट गरेको १ हप्तासम्म समितिलाई पूर्णता दिन नसक्नुको कारणबारे स्रोत भन्छ, शेरबहादुर देउवा, रामचन्द्र पौडेल, अष्टलक्ष्मी शाक्यदेखि प्रधानमन्त्री केपी ओलीसम्मको फोन नै बाधक भएको उल्लेख गरेको छ । यसले के कुरा पुष्टि गर्दछ भने रेडक्रस जस्तो मानवीय संस्थालाई पनि राजनीतिककर्मीहरुले आफ्नो स्वार्थ सिद्ध गर्ने अखडाको रुपमा परिभाषित गरेको र कमाई खाने साधनको रुपमा लिएको स्रोतको दाबी छ ।