अक्षरमा रचनाहरु

मोहन दुवाल । नेपाली साहित्यमा सुपरिचित नाम हो । वि.सं.२०२० सालदेखि नेपाली साहित्यमा प्रवेश गरेका दुवालको पछिल्लो कृति अक्षरमा रचनाहरु प्रकाशित भएको छ । विषय विविधता समावेश गरेका लेख रचनाहरुको सङ्ग्रहको रुपमा ‘अक्षरमा रचनाहरु’ आएको छ ।
नेपालमा बहुदलिय व्यवस्थाको पूर्नस्थापना पछिका समयावधीमा विभिन्न पत्रपत्रिकाहरुमा समय सन्दर्भमा लेखिएका विभिन्न ५९ वटा लेखहरु यसमा सङ्ग्रहित रहेका छन् । प्रस्तुत लेखहरुमा आफ्नो विचार,दर्शन लगायतका बैचारिक लेखहरु परेका छन् । कतै उनी आम नेपालीका दुःख, पीडा र दर्दहरुमा दुखेका छन् त कतै देशको यो वेथितीप्रति आक्रोशको आवाज बुलन्द गरेका छन् ।उनमा राष्ट्रभक्तिको उच्चभाव देखिएको छ । नेपालको सामाजिक, साँँस्कृतिक विशेषताको बारेमा उनले बोलेका छन् । यसमा राजनीतिक घट्ना परिघट्नाहरुको सन्दर्भ उठाएर ठीक वेठिक के हो भन्ने बारेमा पनि लेखेका छन् । उनी विचारमा प्रष्ट छन् ।
लामो समयसम्म शिक्षकको भूमिका निर्वाह गरेका दुवालले नेपालको शैक्षिक क्षेत्रको दुर्गती र त्यहाँ देखापरेका विकृति र विसंगतीको साँङ्गोपाङ्गो चित्रण पनि यस पुस्तकमा पढ्न पाइन्छ । उनी कवि कमलो मनका छन् फुलको सौन्दर्यतामा रमाएका छन् यहाँ भने मान्छेको कुदृष्टीमा फूल रिसाएको अभिब्यक्ति दिएर मान्छेको निष्ठुरीताको पक्ष उल्लेख गरेका छन् ।
हाम्रा आफ्नै प्रचलित संस्कार र संस्कृतिहरुका विकृत पक्षहरुको बारेमा पनि उनले वोलेका छन् । देशको भयावह, राजनीतिमा भित्रिएका विकृति उजागर गर्ने यत्न गरिएको छ यो कृतिमा । विगतको दरवार हत्याकाण्डमा कविमन दुखेर पोखिएको छ । नेवारी साहित्य, नेपाली साहित्य,नेवा संस्कृति आदिको बारेमा पनि महत्वपूर्ण आलेख समावेश गरिएको छ । वृद्धको शान्ति भूमी अशान्ति छाउँदा कविमन दुःखी बनेको छ । भत्भती पोलेको छ दुवालको मन गरिवी र अभावले आक्रान्त नेपाली जनताको सकसमा ।नेताहरु नीति प्रधान नभएर व्यक्ति प्रधान भएसँग असहमत छन् उनी । नयाँ नेपालमा परिवर्तनको अनुभूति गर्न नसकेका दुवाल विगतको संविधानसभाको सन्दर्भमा पनि वोल्छन् । जनमतको सबैले कदर गर्नुपर्नेमा उनको जोड छ । विरालो थुनेर श्राद्ध गर्ने परिपाटी समयानुकुल शंसोधन हुन अपरिहार्य भएको बताउँछन अक्षरमा विचार मार्फत दुवाल ।
नेपाली भाषा साहित्यका निरन्तर साधक मोहन दुवालको यो पछिल्लो कृति राजनीति,दर्शन,नेपाली तथा नेवारी भाषा साहित्य, विकास, राष्ट्र र राष्ट्रियता, शान्ति, सुव्यवस्था, माओवादी आन्दोलन, शिक्षा, महिला लगायतका विविध विषयमा उनको दृष्टिचेतले पोतिएका रचना गर्भहरु रहेका छन् । जुन महत्वपूर्ण छन् । ओजिला छन् । विषयवस्तुमा गहिरो भाव व्यक्त भएका छन् । विचारले अव्बल छन् । भावनाले भरिपूर्ण छन् । निष्कर्षमा भन्दा पठनिय छन् । जनमत वाङ्मय प्रतिष्ठानले यसलाई प्रकाशन गरेको हो । हार्दिक बधाई मोहन दुवाललाई । (प्रदीप)