पृथ्वी

– हेमन्त गिरी

देश कसले बनायो ?

मानिस भन्छ– मैले बनाएँ !

झण्डा कसले बनायो ?

मानिस भन्छ– मैले बनाएँ !

नक्सा कसले बनायो ?

मानिस भन्छ– मैले बनाएँ !

सीमाना कसले बनायो ?

मानिस भन्छ– मैले बनाएँ !

पृथ्वी कसले बनायो ?

यो भन्न पनि पछि पर्दैन मानिस– मैले बनाएँ !

धेरै थोक बनाउछु भनेर दावी गर्छ मानिस

इतिहास बनाउछु भन्छ,

इमारत बनाउँछु भन्छ,

भूगोललाई भाग लगाउँछु भन्छ,

भूमिमा हुकुम चलाउँछु भन्छ !

मानिस यत्ति मात्र भन्न सक्दैन–

जे बनेको थियो त्यसलाई बिगार्दिन !

पृथ्वीलाई अब थप फोहोर बनाउँदिन !

मानिस बन्नु अघि

धेरैथोक बनिसकेका थिए पृथ्वीमा !

मानिस बन्यो

अनि

पृथ्वी माथि नै औंला उठायो !

कहाँ कहाँ पस्छन

के के चलाउँछन

कता कता कोतर्छन

के के कोट्याउँछन

मानिसका औंला जत्तिका फोहोर पदार्थ

यो पृथ्वीमा अरु के होलान ?!

यो मौसममा औंलाहरुले

मगजको मलद्वार कोट्याइरहेछन

र

आफै सुंघिरहेछन

अनि भनिरहेछन–

छ्या, पृथ्वी गनायो !

धन्न मानिस,

तिमी संग तर्कका अनेक अत्तर छन

र

तिमी नमरे सम्म गनाउँदैनौ !!