पाठक पत्र

जनवर्गीय संगठनहरुलाई खुल्ला पत्र

श्रीमान् तत् ज्यूहरु
अखिल नेपाल किसान संघ एमाले
अखिल नेपाल किसान संघ मा.के.
किसान संघ नेपाली कांग्रेस
अनेरास्ववियू एमाले
अ.ने.रा.स्व.वि.यु. मा.के.
नेवि संघ नेपाली कांग्रेस
रा.प्र.पा वि. संघ राप्रपा तत्….
संगठन निर्माणका क्रममा तपाईहरु गाउँ, घर, विद्यालय तथा क्याम्पसहरुमा आउँदा आफूमात्र नेपाली जनताको एकमात्र मुक्तिदाता किसानहरुको हकहित, अधिकारका लागि लड्ने हुनाले हाम्रो मन लोभ्याएर संगठनको धोक्रो भर्नुभयो ।
चुनावमा भोट पाएपछि फरार छौ किन ? धान, मकै रोप्ने समयमा मल छैन, बिउ छैन, सिँचाइ छैन, बल्ल बल्ल उत्पादन भयो, उत्पादनको लागत उठ्दैन तर पनि किसानका लागि केही बोल्दैनौ किन ? किसानहरुको हितमा न्यूनत्तम नैतिकता त देखाउ । आफूलाई वामपन्थी हुँ भन्ने हामपन्थीहरुले सरकार चलाउँदा र अरुले चलाउँदा आखिर भिन्नता के त ? चरित्र उही, चाल चलन उही, किन तपाईंहरु पूर्व पञ्चायतका मन्त्री र सरकार जतिको हुन नसकेको ?
के लोकतन्त्र भनेको नेताहरुले मिलिभगत गर्ने लुटतन्त्र मात्रै हो ? माधव नेपाल, प्रचण्ड, शेरबहादुर, ओलि, उपेन्द्र, बाबुराम, कमल थापा र तिनका भजन मण्डलीहरुले लुटेर खाने समय र सत्ता, शक्ति र सम्पत्ति पालैपालो लुट्न कार्य नै लोकतन्त्र हो त ?
चुनावको बेलामा तस्कर, माफिया र व्यापारीहरुसँग नोट लिई जनतालाई झुटको आश्वासन दिएर लिएको भोटको घृणित खेती अब कति दिन चल्ला प्रजातान्त्रिक तथा लालगद्धारहरु हो ? न्यूनत्तम नैतिकता त देखाउ । राजनीतिक पार्टीका पेशागत संगठनहरुलाई पेशागत मर्यादा, आचरण र आन्दोलनका रुपमा नचलाउने हो भने पार्टी संगठन अब प्राईभेट कम्पनीका रुपमा रुपान्तरण गर । जनवर्गीय संगठनका पदाधिकारीहरुलाई कम्पनीको वस्तुगत मेनेजर र शाखा प्रमुख बनाउ, होइन भने राजनीतिक संगठनको न्यूतत्तम आधारभूत सिद्धान्त सिकाउ ।
विगतमा सामान्य मूल्य वृद्धिमा नारा, जुलुस, बन्द, हड्ताल गर्ने, रेलिङ्ग भत्काउने, नेपाल बन्द गर्ने, अखिल र नेवि संघहरु आज कहाँ छन् ? र के कुरामा कमिसन र दलाली गर्दै छन् ? यति धेरै महँगी बढ्दा किन बोल्दैनन् ? आँखा भएर पनि अन्धा, कान भएर पनि बहिरो बनेका यिनै दलाल विद्यार्थीहरु नै भोलिको पार्टीको नेता हुनाले तिमीहरुबाट हामीले अब के आशा गरौं ? अब हाम्रा छोराछोरी तिमीहरुको संगठनमा किन लाग्ने ? जोसँग न्यूनत्तम नैतिकता र इमान्दारिता नै छैन भने ! सबैलाई चेतना भया ।

उही विर्ख बहादुर पुलामी
हाल ः दोहा, कतार