तिनीहरुलाई श्रद्धाञ्जली

सिन्धु पौडेल, इजरायल

एकातिर देश बाढीपहिरोबाट आक्रान्त छ
निर्दोष जनताको ज्यान गइरहेको छ
रित्तिए होलान् धेरैका काख
पुछिए होलान् थुप्रैका सिउँदो
भवितव्यमा परेर
सर्वश्व गुमाउनुपरेको सङ्गीन पीडाले
पोलिरहेको घाउमा
कसले लगाइदिने
मल्हम-पट्टी

अर्कोतिर सत्तालिप्सामा होडबाजी गर्दै
कुकुरले हड्डी लुछे जस्तै
नेपाल आमाको छातीमा
स्वार्थका नङ्ग्रा गाड्न अभ्यस्त
कपुतहरु
दिनरात लडिरहेका छन्
देश बगेको पत्तै पाउॅदैनन् तिनीहरु

पहिरो जादाँ
एउटा नदी, एउटा खोला या
एउटा भिर मात्र बग्दैन
देश नै बगेर जान्छ
देश बगेर परदेशसम्म पुग्छ
सङ्गै बगेका छन्
गरिबका सपना
र आमाका आँसु
जनतालाई कौडीको भाउमा बेचेर
आफू सत्तासीन हुनेहरु
देख्दैनन् कहिल्यै अभावको आकाश खसेको

कर्मको करेसाबारीमा
उद्धम गरेर खानेहरु
अकालमा ज्यान गुमाउँदै
आफन्तलाई अनाथ पार्न विवश हुँदा
निमुखाको रगतमा होली खेलेर
पापको सिंहासन हडप्न लालायित हुन्छन्
यहाँ
बाच्नुपर्नेहरु मर्न बाध्य छन्
मर्नुपर्नेहरु बाँचिरहेछन्
श्रद्धाञ्जली त तिनीहरुलाई दिनुपर्ने
जो आफू बाचेर
अरुलाई मर्न बाध्य पारिरहन्छ्न्॥

अहिलेको यस्तो स्थितीमा पनि
सत्ताकै होडबाजीमा लुप्त भएर
लागेको देख्दा कुन नेपालीको मन खुसि होला र??