‘राजेन्द्र विमल जीवित भएको भए साहित्यबाट समाजलाई जागरुक बनाउनुहुन्थ्यो’ : सिके लाल

काठमाडौं / राजनीतिक विश्लेषक सिके लालले मधेश आन्दोलनबाट प्राप्त उपलब्धि धर्मको राजनीतिका कारण धरापमा पर्न सक्ने चेतावनी दिएका छन्।

शनिबार काठमाडौंको आलोकनगरस्थित इम्पेरियल होटलमा आयोजित ‘मधेशः अबको बाटो’ संवाद शृंखलाअन्तर्गत साहित्यकार डा. राजेन्द्र विमलको श्रद्धाञ्जली कार्यक्रममा बोल्दै सिके लालले पछिल्लो समय बढ्दै गएको सामाजिक तथा राजनीतिक ध्रुवीकरणप्रति चिन्ता व्यक्त गरेका हुन्।

उनले डा. विमल जीवित भएको भए साहित्यका माध्यमबाट समाजमा फैलिएको द्वन्द्व र असहिष्णुता कम गर्न महत्वपूर्ण भूमिका खेल्ने बताए। “राजेन्द्र विमल आज जीवित भएको भए फैलिरहेको द्वन्द्वको आगोमा साहित्यको माध्यमबाट पानी हाल्ने काम गर्नुहुन्थ्यो,” उनले भने।

कार्यक्रममा सहभागी वक्ताहरूले डा. विमलले साहित्य, भाषा तथा मधेशी चेतनाको क्षेत्रमा पुर्‍याएको योगदानको स्मरण गर्दै उनका अप्रकाशित रचनाहरू प्रकाशन गर्नुपर्नेमा जोड दिए।

साहित्यकार धिरेन्द्र परमार्शीले डा. विमलका महत्वपूर्ण लेख तथा रचनाहरू अझै प्रकाशन हुन बाँकी रहेको बताए। गोरखापत्रका पूर्वसम्पादक तथा महाप्रबन्धक सीताराम अग्रहरीले उनलाई मैथिली भाषाका सशक्त स्रष्टाका रूपमा स्मरण गर्दै उनको साहित्यिक योगदानलाई रवीन्द्रनाथ टैगोरसँग तुलना गर्न सकिने धारणा राखे।

पूर्वसंविधानसभा सदस्य विमल केडियाले डा. राजेन्द्र विमलको सम्मानमा हुलाक टिकट प्रकाशन गर्न पहल गर्नुपर्ने माग गरे।

शहीद संजय चौधरी प्रतिष्ठानद्वारा आयोजित कार्यक्रममा नेपाल प्रज्ञा–प्रतिष्ठानकी रूपा झा, कृष्णराज सर्वहारी, मधेशी आयोगका पूर्वअध्यक्ष विजय दत्त, पूर्वप्रमुख जिल्ला अधिकारी नागेन्द्र झा, पूर्वप्रहरी निरीक्षक रामेश्वर यादव, अधिवक्ता राजेन्द्र साह, आनन्द गुप्तालगायत साहित्यकार, बुद्धिजीवी तथा विभिन्न क्षेत्रका व्यक्तित्वहरूको उपस्थिति थियो।

कार्यक्रमको अध्यक्षता शहीद संजय चौधरीकी बहिनी तथा प्रतिष्ठानकी अध्यक्ष ममता चौधरीले गरेकी थिइन्।