पीडामा पनि छोरीको मायाले बाँच्ने साहस : ‘नौ गेडी–२’ सार्वजनिक

काठमाडौं / नेपाली समाजमा तीज महिलाले आफ्ना पीडा, भोगाइ र सामाजिक यथार्थलाई गीतमार्फत अभिव्यक्त गर्ने महत्वपूर्ण अवसरका रूपमा पनि लिइन्छ। यही सामाजिक यथार्थलाई केन्द्रमा राखेर तयार गरिएको तीज गीत ‘नौ गेडी–२’ सार्वजनिक भएको छ।

उच्च अदालतका पूर्वन्यायाधीश तथा गीतकार भीमकुमार ओझाको शब्द, गायक–संगीतकार सन्तोष बीसीको लय, गायिका टीका सानुको स्वर तथा पूर्ण संयोगको संगीत संयोजनमा तयार भएको गीतले नेपाली बुहारीले भोग्नुपर्ने पारिवारिक पीडा, सामाजिक विभेद र त्यसबीच कायम रहने मायाको सम्बन्धलाई प्रस्तुत गरेको छ। गीत तथा भिडियो ओझाकै Bhim Kumar Ojha YouTube च्यानलमार्फत सार्वजनिक गरिएको हो।

यसअघि सार्वजनिक ‘नौ गेडी–१’ मा सासु, नन्द, जेठानी र श्रीमान्बाट मानसिक यातना भोगेकी बुहारी आत्महत्याको प्रयाससम्म पुगेर सानी छोरीको मायाका कारण जीवनमा फर्किएको कथा प्रस्तुत गरिएको थियो। त्यसैको निरन्तरताका रूपमा आएको ‘नौ गेडी–२’ मा पनि बुहारीमाथिको पारिवारिक पीडा र हेपाइलाई प्रस्तुत गरिएको छ। तर यसपटक उनको जीवन अघि बढाउने सबैभन्दा ठूलो शक्ति छोरीप्रतिको निर्मल माया बनेको छ।

गीतले विवाह गरेर आएको महिलालाई केवल ‘बुहारी’का रूपमा हेर्ने तथा उनीमाथि हुने मानसिक र पारिवारिक हिंसालाई परम्परा र संस्कारका नाममा सामान्य मान्ने सामाजिक मानसिकतामाथि प्रश्न उठाएको छ।

भिडियोमा टीका सानुले बुहारीको भूमिका निर्वाह गरेकी छन्। उनको अभिनयमा पीडा, मौन विद्रोह र सन्तानप्रतिको आमाको असीम माया देखिन्छ। संवादभन्दा अनुहार र आँखाको भावमार्फत पीडा प्रस्तुत गरिएको उनको अभिनय भिडियोको महत्वपूर्ण पक्ष बनेको छ। सानी छोरीको भूमिकामा बालकलाकार रूबिका बास्कोटा देखिएकी छन्।

श्रीमान्को भूमिकामा सन्तोष बीसी स्वयं देखिएका छन्। जँड्याहा तथा गैरजिम्मेवार श्रीमान्को चरित्रमार्फत उनले श्रीमतीको पीडा नबुझ्ने पुरुषप्रधान मानसिकतालाई प्रस्तुत गरेका छन्।

त्यस्तै, सासुको भूमिकामा गीतकार भीमकुमार ओझाकी जीवनसंगिनी देवी ओझा देखिएकी छन्। आयुष्मा खत्रीले नन्द र लीला थापाले जेठानीको भूमिका निर्वाह गरेका छन्। यी पात्रमार्फत बुहारीले आफ्नै घरभित्रबाट भोग्ने मानसिक दबाब र पारिवारिक यातनालाई चित्रण गरिएको छ।

यसको विपरीत, भीमकुमार ओझा स्वयं समझदार र सहानुभूतिशील ससुराको भूमिकामा देखिएका छन्। उनको चरित्रमार्फत परिवारका सबै सदस्य एउटै सोचका हुँदैनन् र कठोर वातावरणमा पनि मानवता तथा सहानुभूति बाँकी रहन सक्छ भन्ने सन्देश दिन खोजिएको छ।

भिडियोमा विवाहपछिको सामाजिक अन्धविश्वासलाई समेत कथाको महत्वपूर्ण पाटो बनाइएको छ। बुहारीलाई घर भित्र्याउने क्रममा जेठाजु ढलेपछि त्यसको दोषसमेत नयाँ बुहारीमाथि थोपरेर उनलाई ‘अलक्षिनी’ ठान्ने मानसिकता प्रस्तुत गरिएको छ। सामान्य घटनालाई समेत महिलामाथि दोष लगाउने पुरानो सोचलाई भिडियोले प्रश्न गरेको छ।

समग्रमा ‘नौ गेडी–२’ तीजको मनोरञ्जनमा मात्र सीमित नभई नेपाली समाजमा बुहारीले भोग्दै आएका पारिवारिक तथा सामाजिक पीडाको चित्रण गर्ने सिर्जना बनेको छ। गीतका शब्दमा पीडा, लयमा संवेदना, टीका सानुको स्वरमा करुणा र दृश्यमा सामाजिक यथार्थ प्रस्तुत गरिएको छ।

गीतको सबैभन्दा मार्मिक पक्ष भनेको पीडाले थिचिएकी एउटी आमालाई जीवनबाट हार्न नदिने शक्ति अन्ततः आफ्नै सानी छोरीको माया बन्नु हो। यही मायाले उनलाई पीडाबीच पनि बाँच्ने साहस दिन्छ।

‘नौ गेडी–२’ ले तीज गीतको परम्परागत मनोरञ्जनभन्दा माथि उठेर महिलाको पीडा, मातृत्वको शक्ति र पारिवारिक संवेदनशीलताको सन्देश दिन खोजेको छ।