करमा ९५ प्रतिशत छुट, व्यवसायीलाई ५३ दिनको मिनाह

पनौती/कोभिड–१९ को कारण आघातमा परेका व्यवसायी तथा नगरवासीहरुका लागि पनौती नगरपालिकाले आर्थिक वर्षको नीति तथा कार्यक्रममा आमूल परिवर्तन गरेको छ । तिललाई पहाड बनाउनेहरुका लागि पनौती नगरपालिकाको निर्णय अनुकरणीय सावित भएको छ ।

त्यसैको सेरोफेरोमा रहेर नगरसभाले आर्थिक वर्ष ०७७।०७८ का लागि जारी गरेको कर नीति सम्बन्धी जानकारी लिने क्रममा राजश्व शाखा प्रमुख लक्ष्मण मातंछेको तर्क छ– अरुले के गरे थाहा भएन, अरुको जस्तो सेवा त पनौती नगरपालिकाले पु¥याउन सकेन होला तर केही चर्चा गर्न लायक काम भने यो नगर सभाले गरेको छ ।

नगरसभाले एक सय देखि ५ सय सम्म सम्पत्ति कर तिर्ने नगरवासीलाई ९५ प्रतिशत छुट दिएको छ । मात्रै रसिद कर बापत २५ रुपैयाँ लिएको छ । त्यसैगरी व्यवसाय करमा बुझाउँदै आएको कर पौष मसान्तभित्र बुझाए ३० प्रतिशत दिएको छ । कोभिड–१९ ले थला परेका नगरवासीका लागि यो निर्णयले केही राहत पक्कै मिल्छ भन्ने विश्वास नगरसभाले छ । त्यसैगरी खानीजन्य उद्योगमा लाग्दै आएको रोयल्टीमा आश्विन मसान्तभित्र बुझाएमा जरिवाना बापतको रकम पूरै मिनाह गरेको छ ।

विदेशबाट फर्केका नगरवासीले व्यवसाय सञ्चालन गर्न चाहेमा व्यवसाय दर्ता सिफारिस, प्रमाणपत्र लगायतको क्षेत्रमा लाग्ने करमा ५० प्रतिशत छुट दिएको छ । त्यसैगरी नगरपालिकाद्वारा निर्माण गरेका संरचनाहरुमा भाडामा बस्ने व्यवसायीहरुका लागि लकडाउन अवधिभरको भाडामा ७५ प्रतिशत छुट दिएको छ । त्यसैगरी टेण्डर कबुल गरेर व्यवसायमा सरिक भएका टेण्डरदाताहरुलाई लकडाउन अवधिभरको रकम मिनाहा गरिएको छ । जसबाट टेण्डरदाताहरु नगरपालिकाप्रति आभारी रहेको बताएका छन् भने कृषि र पशुपालन व्यवसाय दर्ता, सिफारिस, प्रमाणपत्र लगायतको शीर्षकमा लाग्दै आएको शुल्कमा पूरै छुट दिएको शाखा प्रमुख मातंछेले बताउनुभएको छ ।

विभिन्न नगरपालिकाले नीति तथा कार्यक्रम सार्वजनिक गर्ने क्रममा जुन किसिमको प्रतिबद्धता जारी गरेका छन् तर व्यवसायमा संलग्न व्यक्तिहरुले दिनुपर्ने सेवा सुविधाहरुमा भने कञ्जुस्याईं गरेको उपभोक्ताहरुको गुनासो छ ।