अबैध नदीजन्य पदार्थ उत्खनन्

उर्मिला यादव
नवलपरासी/जिल्ला प्रहरी कार्यालय पश्चिम नवलपरासीले जिल्लाको बिभिन्न स्थानबाट नदीजन्य पदार्थ उत्खनन कार्यमा संलग्न ६ वटा टयाक्टरलाई नियन्त्रणमा लिनुका साथै १ लाख २८ हजार मुल्य बराबरको अबैध मालसमान बरामद गरिएको थियो ।
गत मंगलबार सुस्ता गाउँपालिका वडा नम्बर तीनमा रहेको बिज्ञाप स्थित नारायणी नदीबाट अबैध रुपमा बालुवा उत्खनन गरी लोड गर्दै गरेको अबस्थामा लु ३ त ४६०८, लु ४ त ३१२९, लु ४ त ३१५७, लु २ त ३२०९, लु ४ त २०२६ नम्बरको ५ वटा टयाक्टर र सोहि स्थानबाट अबैध रुपमा गिट्टी लोड गर्दै गरेको लु ४ त १२६३ नम्बर टयाक्टर समेत गरी ६ वटा टयाक्टरलाइ इलाका प्रहरी कार्यालय बेलाटारी र प्रहरी चौकी कुडियाबाट खटिएको प्रहरी टोलीले नियन्त्रणमा लिएको थियो । नियन्त्रणमा लिएका ६ वटा टयाक्टरलाई आबश्यक कारवाहीका लागि गत मंगलबार नै सुस्ता गाउँपालिकाको कार्यालयमा बुझाइएको प्रहरीले जानकारी दिएको छ ।
यस्तै गरी सिमा प्रहरी चौकी महेशपुर र प्रहरी चौकी भुजहवाबाट खटिएको संयुक्त प्रहरी टोलीले नेपालबाट भारततर्फ अबैध रुपमा लैजादै गरेको ५८ हजार मुल्य बराबरको २५ बोरामा सात सय पच्चिस किलो हरीयो मटर सरावल गाउपालिका वडा नम्बर सात भटौलियाबाट बरामद गरेको थियो । प्रहरी चौकी बसहियाबाट खटिएको प्रहरी टोलीले नेपालबाट भारततर्फ अबैध रुपमा लैजादै गरेको अन्दाजी १६ हजार मुल्य बराबरको ४ बोरामा दुई सय किलो हरीयो केराउ प्रतापपुर गाउँपालिका वडा नम्बर ५ बसहियाबाट बरामद गरेको जनाएको छ ।
सिमा प्रहरी चौकी महेशपुरको प्रहरी टोलीले भारतबाट अबैध रुपमा नेपाल तर्फ ल्याउदै गरेको अन्दाजी ३४ हजार २ सय मुल्य बराबरको चुकुल, कब्जा, पाइप लगायत बिभिन्न हार्डवयरका सामान सरावल गाउपालिका वडा नम्बर ७ बुलन्दपुरबाट बरामद गरेको बताएको छ ।
त्यस्तै भारतबाट नेपालतर्फ अबैध रुपमा ल्याउदै गरेको अन्दाजी १४ हजार ४ सय मुल्य बराबरको लेडिज कुर्ता, सुरुवाल, ब्लाउजको थान कपडा प्रहरी चौकी गेर्मीबाट खटिएको प्रहरी टोलीले पाल्हिनन्दन गाउँपालिका वडा नम्बर ४ लोहरौलीबाट बरामद गरेको प्रहरीले जनाएको थियो । भारतबाट नेपाल तर्फ अबैध रुपमा ल्याउदै गरेको अन्दाजी ५ हजार ५ सय मुल्य बराबरको २ बोरामा एक सय किलो चिनी इलाका प्रहरी कार्यालय अमानिगंजबाट खटिएको प्रहरी टोलीले पाल्हिनन्दन गाउपालिका वडा नम्बर २ गोपालपुरबाट बरामद गरेको थियो । उक्त मालसमानहरु मोटरसाइकलमा राखि ल्याउँदै गर्दा प्रहरी टोलीलाई देखि सामान फाली मानिस भागेको प्रहरीले बताएको थियो ।
बरामद भएका सबै मालसमान आवश्यक कारवाहीका लागी महेशपुर भन्सार कार्यालयमा बुझाइएको जिल्ला प्रहरी कार्यालय पश्चिम नवलपरासीका प्रहरी नायब उपरीक्षक राजु लामाले जानकारी दिएका थिए ।