दुई कमरेड

टक गुरुङ

एउटा कमरेड
कपाल
जुँगा र
दाह्रीको चारकोसे झाडी
अनुहारमा उमारेर
मार्क्स जस्तै
हुबहु
दुरूस्तै
ठ्याक्कै
ठ्याम्मै
काटिकुटी
हुलिया बनाएर
अरमानीको सूट
गुचीको चस्मा
रोलेक्स घडी
लुइ भेटोनको जुत्ता लगाएर भन्दैछन्
संसारका मजदूर एक हौं ।
उसले बुझेको छ ।
यी सामान कतै न कतैको मजदुरले बनाएको हो
यी सामान बनाउने मेसिन कुनै न कुनै मजदुरले बनाएको हो
यी सामान बनाउने मेसिन बनाउने औजार कोही न कोही मजदुरले बनाएको हो
र यी सामान बनाउने मेसिन बनाउने औजार पनि मजदूरले नै बनाएको हो
त्यही कमरेडले द्वन्द्वात्मक भौतिकवाद पढेर
जनतालाई शिर्षासन गराईरहेछ
किनकी उसले यो पनि पढेको थियो कि ।
मार्क्स टर्नण्ड हेगेल अप साइड डाउन !
अर्थात
मार्क्सले हेगेललाई टाउकोको बलमा उभ्याए !
अर्को कमरेड
गृहस्थीको डुंगा
जिम्मेवारीको नदीमा डुबेको बेला
उद्दारका लागि
बैंकको क्लाइन्टको सूचिमा पर्न
असफल भए पछि
साहुको संघारमा साष्टाङग गरेर
प्रवासीए पछि
आजै थापेको
महिनावारी ज्याला
हुण्डीबाट घर पठाएर
बुर्ज खलिफाको फेदामा बसेर
दुष्चक्रको चक्रबाट
मुक्ति
आजादी
स्वतन्त्रता
निर्वाण
प्राप्त गर्ने शुत्रको खोजमा
अतिरिक्त मुल्यको सिध्दान्तमा
घत्लिरहेको छ र
सामाजिक संजालको भित्तामा टाँसेको
नेताको ठूलो दरबारलाई
आफ्नो झुप्रो संग दाँजेर
चिन्तन गर्दैछ
गम्भीर आत्मसमिक्षा गर्दैछ
त्यही दास क्यापिटल पढेर
किन आफू
हुँदा खानेबाट हुने खानेमा
रुपान्तरण हुन सकेन
नेपथ्यमा सरकार फलाक्दैछ
फ्रि भिजा फ्रि टिकेट
अबैधानिक ब्रिप्रेषणले देश डुब्न लाग्यो आदि आदि
पर्दा पछाडि अंकल साम
बिप्रेषणको कमिसनले किनेको इष्टकोटमा
मार्क्सले जस्तै दाहिने हात
घुसारेर
नेपोलियन बोनापार्टको जस्तै पोजमा
पोट्रेट खिचाउँदै छन् ।