भ्रमर कुसुम

अविचल आस्था मणि

तनहुँ, नेपाल

१.
म आएँ श्रद्धामा भ्रमर कुसुमाको बगलमा
गरेका भून् भून् छन् असल नतिजाको कबलमा
घुमेका भेटिन्छन् उचित ममता क्षेपण गरी
छु लठ्ठेकी भन्छिन् गजब कुसुमा छन् नकचरी
२.
गरेँ वाचा मिल्ने प्रकृत रमणी यो बखतमा
भने झैं हल्लिन्छिन् अनुभव खुला छन् तखतमा
कुराकानी सङ्लो अलिकति हुने तर्खर भयो
दिई झोंक्का राम्रै पवन सुखमा सामिल रह्यो
३.
दुबै जोडी आँखा भरखर जुधे जो गजबले
छ आत्मा गाँजेको हर क्षण दुबैको अदबले
कतै नौलो बाटो सहज सुविधाको प्रकट होस्
भनेका भेटिन्छन् उचित पल मिल्ने निकट होस्
४.
यसै बेला चम्क्यो गगनतलमा बादल घन
कहाँ कैले मिल्ने सहज तरिका हुन्छ चयन
बहाएकी बास्ना मगमग बिना अत्तर थियो
छ आँखाले सोध्दै, मृदुल मनले उत्तर दियो
५.
खुला गर्छिन् ढोका सब तरफका मग्न युवती
तुना खुल्दा आफैं सहजसित बन्छिन् रसवती
इशारामा चल्छन् विविध मनवाञ्छा शुभ लिई
बिहानीको बेला कुशल प्रतिभा मौलन दिई
६.
सबै राम्रो वेशै शुभ किसिमले बित्दछ दिन
बसेको आत्मामा सुखद विपना हुन्छ यकिन
जसो आए लेखेँ हरफ कविताका सरसर
छु आएको ढोग्ने अवसर मिलोस् लौ सकभर
७.
छु आएको एक्लै अवसर मिलोस् गर्न छ कुरा
कुनै जोहो गर्दैै प्रगति पथमा चढ्न चुचुरा
बढोस् बाटो हिँड्ने मनसुव खुला चाख मनमा
उदाए आकांक्षा सुखद सुकिला झन् चयनमा
८.
सुनी आहा मीठो गदगद म बन्दै अझ गएँ
दियौ चोखो मायाँ अमर ममता स्पन्दित भएँ
खुला ताजा सँग्लो अभिमत दिलायौ रहरिला
सबै खाले चिन्ता पर पर भए ती जहरिला
९.
उदाएकी इच्छा नरम तकिया झैं मलमल
चलाएको हो यो कतिपय कुराको छलफल
गरेको हो इच्छा मजबुत बनोस् झन् मिलनको
नयाँ बाटो रोज्ने कसरत चलोस् यो चलनको
१०.
सबैभन्दा मीठो सरल मन मुस्कान रसिलो
छ संस्कारी शोभा विकसित अहा देख्छु मलिलो
छ माटोको मायाँ अमर ममतामा छलफल
छु इच्छा राखेको समुचित कला होस् झलमल
११.
सबैभन्दा राम्री म छु भुवनमा भन्दछ मन
म सँगै पाकेका रसमय रहे यी सुन्दर धन
भनेकोले बेग्लै सहज सुकिलो होस् रनवन
दिएको हो निम्तो रसिक मन साट्ने सङ तन
क्रमशः