सोचेको भन्दा फरक नै छ

निमा छिरिङ भुटिया

हेरेको जस्तो कहाँ हुन्छ
देखेको पनि कहिले काँही भूल हुन्छ
मनले चाहेको जस्तै
यो तनले कहाँ दिन सक्छ र ––––!

यसैले त भन्नु झन् गाह्रो हुन्छ ।
बाटोमा हिँडे झै
सडकमा कहाँ हिँड्न सक्छ र ––––!

झन जीवनको गोरेटोमा त भन्नु साह्रो छ ।
तर पनि बढ्नु छ
तल र माथि गर्दै यहाँ
हिँड्न सकेसम्मको गोरेटोहरू
कहिले उकाली भेटिन्छ
कहिले ओराली बाटोहरू जीवनको यात्रामा
तर पनि सहज मानी बढिरहनु पर्छ
लक्ष्य नपुगे पनि हामी
एउटा हिँड्ने अभ्यासमा जुट्दै जानु छ ।
फरक त छ
तैपनि
कहिले काँही एउटै लाग्छ जिन्दगीको परिभाषा
कहिले कालो धेर
कहिले काँही सेतो कमी
यस्तै छ सबैको जीवन
यसैले त हाँसी राख्नु छ
भोलिको बिहान कसलाई थाहाँ ––––––?

न जन्मको साइत सटीक पाउँन सकिन्छ
न त मृत्युको दिन यो नै भन्न सकिन्छ
तर दुवै नै सत्य छ ।
सोचेको भन्दा फरक छ
सुन्दर र सुन्दरताको रहस्य
कसले पो जानेको छ
भोलिको दिनमा हुने पलहरू
केवल अनुमानको भरमा बोल्छ सबै
हुन्छ कि हुँदैन त्यो पनि
यहाँ त कति फरक छ ।
हाँस्नु र हँसाउनु पनि त
देख्दा एकै छ
तर हाँस्नु जति आनन्द छ
सायद
हँसाउनुमा यहाँ कति कठिन छ
त्यो जसले गर्दछ
उसलाई पनि भन्न कति फरक छ ।
रुनु त सजिलै भन्नेहरूले
आँसुको महत्व कति जानेको छ
जब झर्छ नि नयनले साँचेको आँसु
सायद
यसको यहाँ कति महत्व छ
यसैभित्र त एउटा फरक लुकेको छ ।
जति लेखिरहे पनि
शब्दको अर्थ उति कठिन बन्दै आउँछ
यसैले बन्द गर्न अब यो कलमलाई भन्न पनि
लगातार बहिरहेको वाक्यहरू रोक्न
सायद कति साह्रो र गाह्रो छ
यसैभित्र पनि त एउटा अन्जान फरक बसेको छ –––!!!