चीनका ब्याट्री निर्माता र नेपाली व्यवसायीबीच प्रत्यक्ष भेटघाट हुँदै

ललितपुर / नेपालमा ब्याट्रीको प्रयोग तथा आयात बढ्दै गएको अवस्थामा चीनका ब्याट्री निर्माता कम्पनीका प्रतिनिधि र नेपालभरका ब्याट्री आयातकर्ता तथा व्यवसायीबीच प्रत्यक्ष भेटघाट तथा छलफल हुने भएको छ।

ललितपुरस्थित एन्जल ट्रेड सेन्टरको कार्यालयमा आगामी २३ अगस्टदेखि २६ अगस्ट २०२६ सम्म हुने कार्यक्रममा चीनबाट आएका ब्याट्री निर्माता कम्पनीका प्रतिनिधिले नेपाली आयातकर्ता तथा व्यवसायीसँग प्रत्यक्ष छलफल गर्नेछन्।

कार्यक्रमको मुख्य उद्देश्य नेपाली बजारको वास्तविक आवश्यकता, उपभोक्ताको माग, उत्पादनको गुणस्तर, मूल्य तथा आपूर्ति व्यवस्थापनबारे चिनियाँ निर्माता कम्पनीलाई प्रत्यक्ष जानकारी गराउनु रहेको छ।

विद्युतीय सवारीसाधन, सौर्य ऊर्जा, इन्भर्टर, ऊर्जा भण्डारण प्रणाली, दूरसञ्चार तथा औद्योगिक उपकरणमा ब्याट्रीको प्रयोग बढ्दै गएकाले नेपालमा आवश्यक पर्ने ब्याट्रीको प्रकार, क्षमता र गुणस्तरबारे छलफल हुने बताइएको छ।

कार्यक्रममा नेपाली व्यवसायीले बजारमा देखिएका समस्या, ग्राहकको माग तथा आवश्यक उत्पादनबारे निर्माता कम्पनीका प्रतिनिधिसँग प्रत्यक्ष जानकारी आदानप्रदान गर्नेछन्। यसबाट नेपाली बजारअनुकूल ब्याट्री उत्पादन तथा आपूर्ति प्रणाली विकास गर्न सहयोग पुग्ने अपेक्षा गरिएको छ।

विशेषगरी लिथियम ब्याट्री, सौर्य ब्याट्री, विद्युतीय सवारीका ब्याट्री, ब्याट्री सेल तथा ब्याट्री व्यवस्थापन प्रणालीलगायत क्षेत्रमा बजारअनुसारका उत्पादन विकासबारे छलफल हुने जनाइएको छ।

त्यस्तै, नियमित आपूर्ति, गुणस्तरको निरन्तरता, मूल्य, ढुवानी तथा दीर्घकालीन व्यावसायिक साझेदारीलाई थप व्यवस्थित बनाउने विषयमा पनि छलफल हुनेछ।

ब्याट्रीको प्रयोग बढ्दै जाँदा प्रयोग भइसकेका ब्याट्रीको सङ्कलन, पुनःप्रयोग तथा पुनर्चक्रणको विषय पनि महत्वपूर्ण बन्दै गएको छ। त्यसैले भविष्यमा ब्याट्री व्यवसायलाई आयात र बिक्रीमा मात्र सीमित नराखी उत्पादनदेखि प्रयोग, सङ्कलन, पुनःप्रयोग तथा पुनर्चक्रणसम्मको सम्पूर्ण चक्रका रूपमा विकास गर्नुपर्ने आवश्यकता रहेको व्यवसायीहरूले बताएका छन्।

चीनका निर्माता र नेपाली व्यवसायीबीचको प्रत्यक्ष भेटघाटले दीर्घकालीन व्यापारिक सम्बन्ध, प्रविधि आदानप्रदान, बजारअनुकूल उत्पादन तथा व्यवस्थित आपूर्ति शृङ्खला निर्माणमा नयाँ अवसर सिर्जना गर्ने अपेक्षा गरिएको छ।