प्रविधिको दुरुपयोग गरेर अपराध बढेको छ ः प्रजिअ पोखरेल

धुलिखेल । नेपाल प्रहरीको ६५औं प्रहरी दिवसलाई आज बिहान जिल्ला प्रहरी कार्यालय काभ्रेको प्रांगणमा सम्बोधन गर्ने क्रममा कार्यक्रमका प्रमुख अतिथि एवं प्रमुख जिल्ला अधिकारी शिवराम पोखरेलको कथन थियो– पछिल्लो समय अनपेक्षित रुपमा अपराधमा संलग्नहरुले प्रविधिको दुरुपयोग गरेर अपराध बढाइरहेको बताउनुभएको छ ।

यस परिस्थितिमा प्रहरी संगठन समय सापेक्षित ढंगबाट चुस्त, दुरुस्त हुनु आजको आवश्यकता रहेको छ । जसरी अपराधीहरु अपराध गर्नका लागि प्रविधिका दुरुपयोग गरिरहेका छन्, त्यसका विरुद्ध प्रहरी संगठन सशक्त रुपमा प्रतिकारमा उत्रिनुका लागि आफूलाई समय सापेक्षित ढंगबाट परिमार्जन गर्नुको विकल्प छैन । प्रहरी संगठनलाई व्यवस्थापन गर्नका लागि आएको ऐनले पनि आज ६५औं वर्ष प्रवेश गरिरहँदा यात्रामा कहिँ केही सुस्तता हुनसक्छ । जतिबेला ऐन आएको थियो, त्यतिबेलाको भन्दा आज संगठनको दायरा सयौं गुणा फराकिलो भएको छ । यति ठूलो संगठनभित्र अपवाद रुपमा केही कमी कमजोरी भए होलान् । त्यसैलाई निहुँ बनाएर सिंगो प्रहरी संगठनलाई नहेरिदिन पनि कार्यक्रमका प्रमुख अतिथि पोखरेलको आग्रह थियो ।
जति नै निष्पक्षता गर्न खोजे पनि कहिँ न कहिँ अवशेषहरु रहन जाने हुँदा ति अवशेषहरुलाई मात्र प्राथमिकतामा लिनु न्यायोचित नहुने तर्क राख्दै प्रमुख अतिथि पोखरेल थप्नुहुन्छ– शान्ति, सुरक्षा, अमन, चयनमा प्रहरी संगठनले खेलेको भूमिका अनुकरणीय रहेको समेत कार्यक्रममा चर्चा गर्नुभएको थियो ।