राज्यको कमजोरी, कालाबजारियाको मौलाउने अवसर

नेपाल एक बहु धार्मिक, बहु साँस्कृतिक परम्पराको धरोहरको रुपमा विश्वमा चिनिँदै आएको छ । जसको प्रतिबिम्ब महान् पर्व वडा दशैंलाई लिन सकिन्छ । जहाँ कुनै धर्म, लिंग, जात भनिँदैन । सबैले आ–आफ्नो गक्षअनुसार मनाउँदै आएका छन् । मान्यजनहरुबाट आशिर्वाद लिनु नै यो पर्वको महत्वपूर्ण पक्ष रहेको छ ।
महान् पर्वका रुपमा मान्दै आएको वडा दशैंलाई कालाबजारियाहरुले कमाउ साधनको रुपमा लिएको उपभोक्ताहरुको गुनासो छ । राज्यको कमजोर उपस्थितिको कारण उपभोक्ताहरु ठगिँदै आउने क्रम यो वर्ष पनि रोकिएन । बजार अनुगमनका अनगिन्ती नाटकहरु मञ्चन भए तर मध्य चहलपहल हुने समयमा कालाबजारियाले अवसर लिए । बजारमा कुनै पनि सामानको मूल्य स्थिर थिएन । जसका कारण उपभोक्ताहरु ठूलो मारमा परे । नखाउँ त दिनभरिको सिकार, खाउँ त कान्छा बाउको अनुहार भनेजस्तै उक्तिको सिकार भए । कुनै पनि वस्तुको भाउ स्थिर नहुँदा उपभोक्ताहरुको छनौट भएको बजेटले सोचेको कुराहरु टालटुल गर्न पनि पुगेन । यो अवस्थामा सम्बन्धित सरोकारवाला निकाय बेखबर रह्यो । जसले विधिको शासनको खिल्ली उडाएको महसुस नेपाली जनताहरुले मनन् गर्न पुगे ।
कोभिड–१९ का कारण लथालिङ्ग भएको नेपाली अर्थतन्त्रमा एकछत्र राज गरेका कालाबजारियाहरुले यसैलाई उपयोग गर्दै आय आर्जनको बलियो स्रोत बनाए । जसको सिकार नेपाली जनता हुन पुग्यो । कोरोना भाइरसको सन्त्रास एकातिर भने अर्काेतर्फ चर्काे बजार मूल्यले कतिका घरमा चूलो बलेनन् । यो यथार्थ पिडा कसले सुनिदिने ? मुलुकका कुना कन्दरामा रहेका नागरिकले एक छाक मिठो मसिनो खाने कल्पना पनि कल्पनामै सीमित भयो । यो दर्दनाक कथा कसलाई सुनाउने ? यो अवस्थामा राज्यका सञ्चालकहरु अझै पनि धमिलो पानीमा माछा मार्न तल्लीन भएको देख्दा ति पिडित नागरिकले नै कठै ! भन्ने अवस्था आएको छ । यो अवस्था सिर्जना गरेर राज्यले आफूलाई निकम्मा सावित गर्दै छ । तसर्थ, तत्काल जिम्मेवार पक्षहरुलाई यि घटनाक्रमका बारेमा स्पष्ट पार्न यसै पत्रिकामार्फत् हामीले ध्यानाकर्षण गराएका छौं ।
हाम्रो आग्रह छ, नेपाली नागरिकप्रति जिम्मेवार बन्दैनौ भने तिमीहरुलाई सत्ताको बागडोर सम्हाल्ने हैसियत पनि नेपाली जनताले दिनुपर्छ भन्ने छैन । त्यसैले सरोकारवाला निकाय जनउत्तरदायी बन्न सकोस्, यही हाम्रो आग्रह छ ।