सुशासन र प्रभावकारी सेवा प्रवाहमार्फत जनताको अपेक्षा पूरा गर्नुपर्छ : राष्ट्रपति पौडेल

काठमाडौँ, राष्ट्रपति रामचन्द्र पौडेलले सुशासन, प्रभावकारी सेवा प्रवाह र तीव्र विकासमार्फत जनताको अपेक्षा पूरा गर्नुपर्ने बताएका छन्।

लोकसेवा आयोगको ७६औँ वार्षिकोत्सवका अवसरमा काठमाडौंमा आयोजित कार्यक्रममा सम्बोधन गर्दै राष्ट्रपति पौडेलले संघीय लोकतान्त्रिक गणतन्त्रका लागि संघर्ष र बलिदान गरेका नेपाली जनताको चाहना सुशासन, शान्ति, प्रगति तथा विकास भएको उल्लेख गरे।

उनले आधुनिक समयको आवश्यकता अनुसार राज्य संयन्त्रलाई अझ जनमुखी, सेवामुखी, प्रविधिमैत्री र परिणाममुखी बनाउनुपर्नेमा जोड दिए। प्रविधि र स्मार्ट सेवा प्रवाहमार्फत कर्मचारीतन्त्रले नागरिकको विश्वास जित्न सके लोकतन्त्रप्रतिको भरोसा अझ सुदृढ हुने उनको भनाइ थियो।

राष्ट्रपति पौडेलले संविधानले अंगीकार गरेको समावेशी लोकतन्त्रको मर्मअनुसार स्थापित योग्यता प्रणालीको संरक्षण र सुदृढीकरण आवश्यक रहेको उल्लेख गर्दै सार्वजनिक प्रशासनलाई थप सक्षम, उत्तरदायी र पारदर्शी बनाउन आग्रह गरे।