औद्योगिक ग्राम स्थापनाको लागि सम्झौता, पाँचखालकोे तरकारी, अर्गानिक सरहको छ – खरेल

आइ.आर.के.मैनाली
पाँचखाल-पाँचखाल नगरमा एक पछि अर्को गर्दै पाँचखालको हितको खातिर सम्झौता हुने क्रम जारी रहेको छ । दक्षिण यशियाकै ठुलो योजनाको रुपमा रहेको पाँचखाल बृहत खानेपानी योजनाको सम्झौता भएको केही दिनमै नेपालमै पहिलो महिला उद्यमी तथा हरित औद्योगिक ग्राम स्थापना हुने भएको छ ।

नेपालमा रहेको ७ प्रदेशमै उक्त उद्योग खोल्ने तयारीका साथ अगाडी बढेको दक्षिण एशियाली महिला विकास मञ्च र महिला उद्यमी महासंघ नेपालले नेपालमै पहिलो सम्झौता पाँचखालमा भएको हो । प्रदेश नं ३ मा खोलिने उद्योग पाँचखालमा खोलिने भएसंगै सातै प्रदेसलाई उछिन्दै प्रदेश नं ३ को पाँचखालमा सम्झौता गरी खाता खोल्ने कार्य भएको छ ।

प्रथम महिला उद्यमी तथा हरित औद्योगिक ग्राम स्थापनाको लागि पाँचखाल नगरपालिका, दक्षिण एसियाली महिला विकास मञ्च र महिला उद्यमी महासंघ नेपाल वीच त्रिपक्षीय सम्झौता भएको छ । सम्झौता कार्यक्रममा नगर प्रमुख महेश खरेल, दक्षिण एसियाली महिला विकास मञ्चका अध्यक्ष प्रमिला आचार्य (रिजाल) र महिला उद्यमी महासंघ ,नेपालका अध्यक्ष शारदा रिजाल विचमा त्रिपक्षीय सम्झौता भएको हो ।
सम्झौता अनुसार पाँचखाल नगरपालिका वडा नं ७ मा प्रथम महिला उद्यमी हरित औद्योगिक ग्राम स्थापना र विकास गर्न सम्झौतापत्रमा हस्ताक्षर भएको उल्नेख छ । प्रथम महिला उद्यमी हरित औद्योगिक ग्राम स्थापना र विकासको लागि पूर्वाधार निर्माण, लगानी, प्राविधिक सहयोग, जनशक्ति विकास तथा औद्योगिक ग्रामको संचालन र व्यवस्थापनमा सहयोग र सहकार्य गर्दै अघिबढ्ने तथा व्यवसायिक स्रोत, साधन र अभ्यासको विकास र उपयोगिताबाट एक अर्काको सबलता, अनुभव र स्रोतको प्रयोगबाट साझेदारी ढाँचामा संरचना बनाई सामुहिक क्रियाकलाप गर्दै सबैको हिततर्फ अग्रसर हुने उदेश्यले सम्झौता भएको पाँचखाल नगरपालिकाले जनाएको छ ।

औद्योगिक ग्राम स्थापना र विकासको लागि पाँचखाल नगरपालिका वडा नं ७ को कित्ता नं ८९, ९० र ११३ गरी जम्मा १२.३ एकड (९८ रोपनी) जग्गा २५ वर्षको लागि उपलब्ध गराउने सम्झौतापत्रमा उल्नेख छ । जुन स्थान पाँचखालमा संञ्चालन हुने बिशेष आर्थिक क्षेत्र (सेज) को नजिक रहने छ । सो स्थानमा संञ्चालन हुने उद्योगहरु बिशेष गरेर कृषिसंग सम्बन्धित रहने जानकारी (सम्झौताको क्रममा) गराईएको छ ।

सम्झौतापत्रमा औद्योगिक ग्रामको पूर्वाधार निर्माणमा संघीय तथा प्रदेश सरकार तथा अन्य निकायबाट हुने आवश्यक सहयोग र अनुदान लिइनेछ । यसको औद्योगिक ग्रामको विकास, सञ्चालन र व्यवस्थापनको कार्यमा सहयोग गर्ने, औद्योगिक ग्राम क्षेत्र भित्रको जग्गाउद्योगहरुको स्थापना, सञ्चालन र विकासको लागि मात्र उपयोग गर्नुपर्ने, औद्योगिक ग्रामको जग्गा जमिन लगायतको सम्पूर्ण सम्पत्तीको प्रयोग, व्यवस्थापन र संरक्षण गर्न नगरपालिकाले आवश्यकता बमोजिम सहयोग गर्ने, औद्योगिक ग्रामको कारण आसपासको वातावरण, मानव जीवनतथा भौतिक विकास निर्माणका कार्यमा असर पर्न नदिईने , औद्योगिक ग्राममा सिर्जना हुने रोजगारीका अवसरमा स्थानीयलाई प्राथमिकता दिइने उललेख गरेको छ ।

सम्झौता कार्यक्रममा पाँचखाल नगरपालिकाका प्रमुख महेश खरेलले प्रथम महिला उद्यमी हरित औद्योगिक ग्राम मुलुक भरमा ७ स्थानमा हुनेमा पहिलो स्थानको रुपमा पाँचखालमा सम्झौता हुनुलाई नगरको अवसर भएको बताउनु भएको छ । उहाँले थप्नुभयो ३ नं प्रदेशमा झण्डै १ सय नगरपालिका रहेको छ, त्यसमध्य पाँचखाल छनोट हुनुमा खुसि व्यक्त गर्नुभयो । यस्ता उद्योगले पाँचखाल नगर देशकै नमुना नगर बन्न टेवा मिल्ने बताउनु भयो ।

कार्यक्रममा प्रमुख खरेलले थप्नुभयो पाँचखालमा उत्पादन भएको कृषि उपजहरुले बजार नपाएको बताउंदै त्यसको व्यवस्थापनको लागि नगरले कार्य अगाडी बढाएको बताउनु भयो । पाँचखालमा तरकारी उत्पादन गर्ने कृषकहरु सधै उस्ताको उस्तै तर विचौलियाहरु धेरै माथि पुग्नाको कारण विचौलियाले कृषकलाई मर्काउदा भएको उपलब्धी हो भन्दै ठोकुवा गर्नुभयो । समृद्ध पाँचखाल बनाउन कृषकलाई धनि पार्नु पर्ने भएकोले नगर सोहि ढंगबाट अगाडी बढेको बताउनु भयो । पाँचखालमा उत्पादन भएको तरकारीहरु अर्गानिक सरह भएको प्रमाणि भएको छ जसको कारण पाँचखालको तरकारी ढुक्कसंग खान मिल्ने अवस्था रहेको बताउनु भयो ।

त्यसैगरी कार्यक्रममा दक्षिण एसियाली महिला विकास मञ्चका अध्यक्ष प्रमिला आचार्य (रिजालले) कार्यक्रमले महिला उद्यमशिलताको विकास र आर्थिक शसक्तिकरणको लागि सहयोग पुग्ने बताउनु भयो । नेपालमै पहिलोपटक स्थापना हुन लागेको उद्योग महिला केन्द्रीत तथा कृषिलाई केन्द्रीत बनाएर सञ्चालन हुनेछ । महिला उद्यमी महासंघ, नेपालका अध्यक्ष शारदा रिजालले नेपालमा आर्थिक योगदानमा महिला उद्यमीहरुको पनि भूमिका रहेकोले महिलाहरुलाई नै समेटेर प्रथम महिला उद्यमी हरित औद्योगिक ग्राम स्थापनामा जोड दिईएको बताउनु भयो ।
सम्झौता कार्यक्रममा पाँचखाल नगरपालिका प्रमुख प्रशासकिय अधिकृत लोक बहादुर भण्डारी, नगरका वडा नं ७ का वडा अध्यक्ष पुष्कर ढकाल, वडा नं ३ का वडा अध्यक्ष सुन्दर अधिकारी, वडा नं ४ का वडा अध्यक्ष सुन्दर लामा, वडा नं १ का वडा अध्यक्ष अष्टबहादुर लामा, वडा नं २ का वडा अध्यक्ष हरिराम खतिवडा,लगायतको उपस्थिति रहेको थियो ।