लाखौं मूल्य बराबरको अवैध सामान बरामद

उर्मिला यादव
नवलपरासी/जिल्ला प्रहरी कार्यालय पश्चिम नवलपरासीले जिल्लाको बिभिन्न स्थानबाट सोमबार अबैध केराउ ओसारपसारमा संलग्न एक ट्रक सामान सहित करिब २९ लाख ३३ हजार २ सय मुल्य बराबरको अबैध मालसमान बरामद गरेको छ ।
जिल्ला प्रहरी कार्यालय पश्चिम नवलपरासीका अनुसार सोमबार बिहान इलाका प्रहरी कार्यालय बर्दघाटबाट खटिएको प्रहरी टोलीले बर्दघाट नगरपालिका वडा नम्बर १२ भटौलिया स्थित ना ४ ख ४६२५ नम्बरको ट्रकलाई रोकेर चेकजाच गर्दा ट्रकमा चार सय बीस बोरामा दुई सय दश क्विन्टल हरियो केराउ फेला परी सोधपुछ गर्दा उक्त केराउसँग सम्बन्धित कुनै पनि कागजपत्र फेला नपरेकोले ट्रक चालक सहित प्रहरीले सामान नियन्त्रणमा लिएको छ । उक्त केराउको अन्दाजी बजार मुल्य १६ लाख ८० हजार र ट्रकको बजार मुल्य अन्दाजी १० लाख गरी कुल २६ लाख ८० हजार मुल्य बराबरको रहेको प्रहरीले जनाएको छ । यस्तै सोमबार बिहान इलाका प्रहरी कार्यालय सेमरीबाट खटिएको प्रहरी टोलीले प्रतापपुर गाउँपालिका वडा नम्बर २ चाँदनी चोकबाट अन्दाजी ८४ हजार मुल्य बराबरको २१ बोरामा १ हजार ५० किलो हरियो केराउ बरामद गरेको छ । उक्त केराउ बेवारिसे अवस्थामा प्रहरीले बरामद गरेको जनाएको छ । जिल्ला प्रहरी कार्यालयबाट खटिएको प्रहरी टोलीले रामग्राम नगरपालिका वडा नम्बर ४ बाइपासमा बेवारिसे अवस्थामा रहेको अन्दाजी ५० हजार मुल्य बराबरको ६ सय ५० किलो हरियो केराउ बरामद गरेको जिल्ला प्रहरी कार्यालय पश्चिम नवलपरासीका प्रहरी नायब उपरीक्षक राजु लामाले जानकारी दिनुभएको छ ।
यस्तै गरी सोमबार नै दिउँसो सिमा प्रहरी चौकी महेशपुरबाट खटिएको प्रहरी टोलीले नेपालबाट भारततर्फ लैजाँदै गरेको अन्दाजी ४४ हजार मुल्य बराबरको १९ बोरामा ५ सय ५० किलो हरियो केराउ पाल्हिनन्दन गाउँपालिका वडा नम्बर १ शंकरपुरबाट बरामद गरेको जनाएको छ । उक्त केराउ मोटरसाइकलमा लैजाँदै गर्दा प्रहरी टोलीलाई देखेर सम्बन्धित व्यक्ति केराउको बोरा फाली भागेका प्रहरीले बताएको थियो ।
जिल्ला प्रहरी कार्यालयबाट खटिएको प्रहरी टोलीले रामग्राम नगरपालिका वडा नम्बर ७ उजैनीबाट करीब ५४ हजार मुल्य बराबरको १४ बोरामा ६ सय ७५ किलो हरियो केराउ र अन्दाजी १३ हजार २ सय मुल्य बराबरको २ सय २० पिस सेण्डो भेष्ट र ८ हजार मुल्य बराबरको ६ वटा सानो ग्यास सिलिण्डर र ग्यास चुल्होमा प्रयोग हुने सामानहरु बरामद गरेको छ । बरामद भएका सम्पुर्ण केराउ, मालसमान, एक ट्रक र सोही ट्रक चालक समेतलाई आवश्यक कारवाहीका लागि महेशपुर भन्सार कार्यालयमा पठाइएको प्रहरी नायब उपरीक्षक लामाले जानकारी दिनुभएको छ ।