जहाँ चाहना त्यहाँ उपाय, असम्भव भन्ने कहीँ छैन ः ई. बस्नेत

पनौती/केही गर्न सकिन्नँ, बजेट छैन भनेर झारा टार्ने नेतृत्वहरुका लागि गोरखनाथ मन्दिर परिसरमा स्थापना हुन लागेको पार्क सहित गणेश मूर्तिको स्थापनाले चुनौती दिएको छ ।
ऐतिहासिक धार्मिक स्थल गोरखनाथ मन्दिरको प्रांगणमा स्थापना हुन लागेको पूर्णकदको गणेश मूर्तिले धार्मिक आस्था कस्तो हुँदो रहेछ भन्ने पुष्टि गरेको निर्माण समितिका सल्लाहकार एवं इन्जिनियर रामकुमार बस्नेतले बताएका छन् । जहाँ चाहना, त्यहाँ उपाय भनेझैं मन्दिरै मन्दिरको शहर भनेर चिनिने ऐतिहासिक धार्मिक नगरी पनौतीमा पूर्णकदसहितको गणेश मूर्तिको अभावलाई पूर्ण गर्न स्थानीयले चासो राखेपश्चात् लायन्स क्लब अफ काठमाडौं इन्द्रेश्वर ३२५ बि १ को पहलमा सम्भावनाको खोजी भएको थियो । त्यहिँबाट प्राप्त उर्जाले आज यो रुप लिन सफल भएको इ. बस्नेतको तर्क छ । पञ्चधातुबाट निर्मित ९ फिट अग्लो मूर्ति स्थापनाका लागि स्थानीय समाजसेवीहरुको प्रयासमा श्रीमद्भागवत् सप्ताह ज्ञान महायज्ञबाट आरम्भ भएको हाम्रो यो यात्रा आजको दिनसम्म आइपुग्दा समाजले कल्पना गरेभन्दा माथि शिखर चुम्न सफल भएको छ । पछिल्लो समय चन्दादाताहरुको लर्काे नै यो अभियानका लागि लागेका छ । सामाजिक व्यक्तित्व देखि संघसंस्था र पनौती नगरपालिकाले समेत उद्धार हृदयले सघाएका छन् । जसको प्रेरणाबाट धार्मिक, पर्यटनको क्षेत्रमा अनुकरणीय योगदान पुग्नेमा निर्माण समिति पुगेको इ. बस्नेतको दाबी छ ।
कोभिड–१९ का कारण केही महिना निर्माण कार्यमा सुस्तता आएपनि पछिल्लो समय द्रुत गतिमा निर्माण कार्य अघि बढेको छ । जसबाट सामाजिक क्षेत्रमा हराउँदै गएको मानव सेवाको भावनालाई जीवन्त राख्ने प्रेरणा यो अभियानले दिएको इ. बस्नेतको तर्क थियो । जनस्तरबाट यस्ता किसिमका अनुकरणीय कार्य भएपश्चात नगर प्रमुख भिम न्यौपाने पनि उत्साहित हुनुभएको छ । जुन हौसलालाई मलजल गर्नको लागि महत्वपूर्ण भूमिका निभाइराख्नु भएको छ । उहाँले यो अभियानमा देखाउनुभएको चासोले पनि ति कुराहरुलाई पुष्टि गर्दछ । नगर प्रमुख न्यौपानेका चाहनालाई पूरा गर्न यस वडाका वडा अध्यक्ष सुधिर सापकोटाको पनि अनुकरणीय भूमिका रहेको छ । वडाबाट जुन साथ र सहयोग यो अभियानको लागि मिलेको छ, त्यसको प्रतिफल आज यो अभियान सफलतातर्फ अग्रसर हुँदै गएको छ । तसर्थ, जुन उद्देश्यसहित निर्माण सम्पन्न गर्न गईरहेका छौं, त्यसका लागि सहयोगी हातहरुलाई अझ निरन्तर सहयोगको अपेक्षा राख्दै उहाँहरुको योगदानको कदर गर्दै निर्माण सम्पन्न पश्चात सम्मान सहित उहाँहरुको योगदानलाई सार्वजनिकरण गर्ने प्रतिबद्धतासमेत रहेको सल्लाहकार इ. बस्नेतले व्यक्त गर्नुभएको थियो ।

यसैगरी सामाजिक, बौद्धिक धरोहर, धार्मिक व्यक्तित्व एवं निर्माण समितिका प्रमुख सल्लाहकार ओतबहादुर खड्काको कथन छ– पनौती नगरपालिका वडा नं. ६ दलिन्चोकमा निर्माण हुन लागेको सौन्दर्य पार्क र पूर्णकदसहितको गणेश मूर्तिको स्थापनाले यस क्षेत्रमा धार्मिक पर्यटनको लागि उद्गम स्थल बन्ने विश्वास रहेको बताउनुभएको छ । यसको महत्व र अर्थका बारेमा जति नै चर्चा गरेता पनि अपूरै रहनेछ । जनस्तरबाट जुन प्रयास भएको छ, त्यसले समाजमा केही गर्नुपर्छ भन्नेहरुका लागि उर्जा मिलेको छ । उत्तर प्रयागको रुपमा धार्मिक महत्व बोकेको यो भूमिमा स्थापना हुन लागेको पूर्णकदसहितको गणेश मूर्ति र पार्क निर्माणमा जुटेको जन–लहरलाई हेर्ने हो भने असम्भव भन्ने केही छैन । मात्रै चाहना र भावना हुनुपर्छ । हामी नेपाली जुनसुकै चुनौती उठाउन सक्षम छौं भन्ने उदाहरणको प्रतिबिम्ब हो यो अभियान भन्नुहुन्छ बौद्धिक धरोहर खड्का ।
स्मरण रहोस्, जुन विषयवस्तुको परिकल्पना गर्दा केही व्यक्तित्वहरुले हावामा उडाउने काम समेत गरेको अभियानका अभियान्ताहरु पोखेका थिए । धैर्यता हुनुपर्छ, पक्कै पनि पूरा गर्न सकिन्छ भन्ने उदाहरण यो अत्याधुनिक पार्क र गणेश मूर्ति स्थापनाका लागि जनस्तरबाट जुटेको सहयोगले पुष्टि गरेको छ । निर्माण सामग्री र नगद समेत निरन्तर जुटिरहेको छ, जसले निर्माण कार्यमा कुनै कुराको कमीको महसुस नहुने संकेत गरेको छ । पारदर्शी ढंगबाट आफूहरु प्रस्तुत भएकै कारण आज यो सफलता मिलेको निर्माण समितिको ठम्याई छ । युवाहरुको विशेष सहभागिता रहेको यो अभियानमा थप उर्जा मिलेको निर्माण समितिका सचिव हरिशरण कार्कीको छ । अनुगमन समितिका संयोजक हरिकृष्ण बस्नेतको तर्क छ– जुन रफ्तारमा काम भएको छ, त्यसको उपज मान्नुपर्छ आजका सहयोगी हातहरु । गुणस्तरीय निर्माणको क्षेत्रमा कुनै सम्झौता हुनेछैन । हामी यही रफ्तारमा पौष महिनाभित्र निर्माण सम्पन्न गरेर सार्वजनिक सुनुवाई मार्फत् फरफार गरेर नमूना पेश गर्नेछौं बस्नेतले खुलासा गरे ।